Sapigalinnut tulluarsaasoqarli
Niuertarfiit inatsisitigut akisussaaffilerneqarnerisigut nioqqutissat sapigalinnut tulluarsakkat saqquminerulernissaat anguniarlugu misissuisoqassasoq, Atuisartunut siunnersuisoqatigiit siulittaasuat Nikolaj Ludvigsen Peqqinnissamut naalakkersuisumut allakkamini piumasaqarpoq.
Nikolaj Ludvigsen aperaarput sooq Peqqinnissamut naalakkersuisumut taama allagaqarnersoq, ima akivoq:
- Uagut peqqissorsuusugut pisiniarfinnut iserutta allagartarsuit takuinnarlugit pisiniarsinnaasarpugut. Sapingalinnguilli pisiaqaratik anisarput. FN-imi EU-milu atuisut siunnersuisooqatigiiffiini malittarisassat sanioqqunneqartuarput. Malittarisassat taakku malillugit atuisut pisinnaatitaaffeqarpugut piumasarsinnaatitaallutillu. Piffissanngorsoraaralu sapigallit pillugit sammisaqarnissarput, Nikolaj Ludvigsen oqarpoq.
Taanna aperaarput suut sapigalinnut nioqqutissat amigaatigineqartarnersut, ima akivoq:
- Assigiinngitsorpassuupput, uangali immikkut taakku ilisimasaqarfiginngikkaluarlugit assersuutigisinnaavakka qajuusat, sukuulaat mamakujuit allarpassuillu nioqqutissat sapigalinnut tulluarsakkat amigaatigineqarput, Nikolaj Ludvigsen oqarpoq.
Taanna apereqqipparput atuisut siunnersuisooqatigiivi Pilersuisorlu nioqqutissat aalajangersimasut saqqumminerusumut ilineqarsinnaanersut isumaqatigiissutigiinnarneqarsinnaanersoq, ima akivoq:
- Niuertarfiit arlallit siornatigut saaffigisarsimavagut, kisianni taakku toqujartuaartut malunnarpoq. Akilersinnaasuseq naapertorlugu taamatut pingaarnersiuisarput. inatsisitigut siunnersuisoqatigiit pisinnaatitalerneqartuugutta niuertarfiillu isumaqatigiissinnaalissangaluarpugut , Nikolaj Ludvigsen oqarpoq.
Atuisartunut siunnersuisoqatigiit siulittaasuata Nikolaj Ludvigsenip ilanngullugu oqaatigaa, inummit ataasiinnaanngitsumit saaffigineqartarluni, nioqqutissanik sapigalinnut tulluarsakkanik ujartuisunik.