Sapigalinnut nioqqutissat
Pilersuisup niuertarfiini Sapigaqartunut tulluarsakkanik nioqquteqartarneq ukiuni kingullerni annertusiartorpoq. Nioqqutissat sapigalinnut sukkortunullu tulluarsakkat ataasiakkaat Pilersuisup niuertarfiini nioqqutissaatigineqartarput, pissarititaasulli apeqqutaallutik piumasarisat tamakkiisumik naammassineqarneq ajortut Pilersuisumi tuniniaanermi pisortaq Niels Erik Petersen:
- Ilisimavarput atuisartut pisariaqartitsinerat annertusiartortoq, taakkulu aamma tusarniartarpavut, taakkualu saniatigut eqqiaanermut tunngasut qaqorsaatinullu tunngasut pigaavut. Naak sapigaqartunut sukkortunullu nioqqutissanik peqareeraluarluta taamaattoq pissarititaasut amerlassusaat akillu apeqqutaallutik tamaasa naammassineq ajorpavut.
- Atuisut isorliunerusuniittut ataavartumik saaffiginnissuteqartarput, soorunami ungasinnerusoq eqqarsaatigalugu atuisut tusarniarnissaat ammaffigaarput, tamakkulu tunngavigalugu Pilersuisumiit qanoq iliuuseqarniartarluta.
Atuisartut siunnersuisoqatigiiffiata siulittaasuata Nikolaj Ludvigsenip atuisartut ajunnginnerusumik atugaqalernissaat anguniarlugu peqqissutsimut naalakkersuisumut Asii Chemnitz Narup-imut saaffiginnissutaa naalakkersuisunut ingerlateqqinniarneqartoq ullaaq radioaviisimi tusarliunneqarpoq.
