Sapernunikoq: Chris Ilulissanut tikippoq
Chris Bech Johansen Sisimiuni sapaatit akunnerani ataatsimi sapernoreerluni Ilulissanut angerlarluni tikippoq.
Taanna tallimanngormat unnukkut nalunaaqutaq 23.59 timmisartuusseqqusaajunnaartoqareersorlu sapernulersut 70-it ilagaat.
AAMMA ATUARUK Chris Sisimiuni sapernusoq: Paasitinneqanngilagut
Inuttaali ippassaq sisamanngornermi Sisimiuniit timmisartorluni kiisami Kangerlussualiarsimalluni oqaluttuarpoq. Inuttaata oqarnera naapertorlugu timmisartoq Maniitsumut, Nuummut Kangerlussuarmullu ingerlaqqittussanik ulikkaarluni ilaasoqarpoq.
Coronavirusimik ajornartoornermi timmisartuusseqqusaajunnaarallarneq
- Air Greenland tallimanngornermi marsip ulluisa 20-anni unnuap qeqqaniit timmisartuusseqqusaajunnaarallarpoq.
- Nunatsinnut nunatsinniillu ulluni 14-ini timmisartuusseqqusaajunnaartoqarallarpoq.
- Illoqarfiit nunaqarfiillu akornanni aamma timmisartuusseqqusiunnaarallartoqarpoq.
- Oqiliallallutalu nuannaarpugut. Soorluluunniit juulliaraannartoq, Chris Bech Johansen oqarpoq.
Pikkorissareerami sapernulertoq
Inuttaa Ilulissani qaammatinik marlunnik utoqqaassusilimmik erneqarpoq - apriilillu ulluisa sisamaanni 30-liissalluni. Ilaquttani akunnaalliliiguni najortussanngormagit nuannaarpoq.
- Angerlarsinnaanngorluta paasigatsigu nuannaajallaqaanga. Ilaquttakka nuannaajallapput – sapernusullu allat aamma nuannaajallallutik, Chris oqaluttuarpoq.
Chris Ilulissani saqisuuvoq, suliffimminullu atatillugu Sisimiunut pikkorissariarsimalluni.
Inuttaa suleqataalu allat Sisimiunut pikkorissariartorlutik marsip ulluisa aappaanni aallarput. Coronavirusili nunatsinnut anngummat matusinerit pipput - tamannalu peqqutigalugu pikkorissarnerat kipineqarluni.
AAMMA ATUARUK Tamaat isigalugu: Coronavirus pillugu killiffik
Taamaattumik Chrisip inuillu Air Greenland aqqutigalugu angalanissaraluartik allanngortinasuartariaqartussanngorpaat. Marsip ulluisa 20-anni taamaaliorput - Air Greenlandilu ulloq taanna naggataajugallartumik timmisartuussisinnaatitaalluni.
Chrisili timmisartoq ilaaffigisassaa teknikkikkut ajoquteqarmat silarlummallu aallanngitsoorpoq.
Sapernulerlunilu.
Sapernusulli Qeqqata Kommunianit nerisaqartitaanikkut ineqartitaanikkullu ikiorneqarput.
Air Greenland naapertorlugu timmisartuusseqqusiunnaarnerup kingorna angerlarlutik angalanerat oqartussanut akiligassanngortinneqarput.