Sapaatip akunnerata naanissaanut aningaasanik tigusigina
Grønlandsbankip aningaasanik tigusisarfii, netbank aamma pisiniarfinni Akiliut matoqqagallassapput arfininngornerup unnukkuaniit sapaammi ualilerneranut.
Allattoq Noah Mølgaard
maajip 31-at 2011 09:05
Grønlandsbanken teknikkikkut iluarsaassiniarpoq. Taamaammat aningaaseriviup sullissineri netbank, GrønlandsBANKENip aningaasanik tigusisarfii, oqarasuaatikkut sullissineq, SMS atorlugu sullissineq, mobilbank kiisalu pisiniarfinni Akiliut atorlugu akiliisarneq matoqqagallassapput.
Tamanna pissaaq arfininngorneq juunip sisamaani nalunaaqutaq 22.00-miit sapaammi juunip tallimaani nalunaaqutaq 14.00-ip tungaanut. Taamaammat illoqarfimmut neriartussagaanni imaluunniit iffiorfimmut ullaakkorsiutisiniassamaaraanni aningaasanik tigusereersimanissaq isumassarsiatsialaassaaq.
Dankort aamma visadankort pisarnertut pisiniarfinni imaluunniit aningaaseriviit allat tigusisarfiini atorsinnaassasut, Grønlandsbanken nalunaarpoq.