Sapaatip akunnerata naanera pilukaffiuvallaanngilaq
Sinerissami politeeqarfiit nalunaarutaat malillugit sapaatip akunnerata naanerra eqqissisimaarfiunerusimavoq.
Alluitsup Paani piniartoq sikorsuit akornannit anillakaassinnaajunnaarsimavoq. Sikorsuaqaqimmat taarsileriivimmallu angallammik qulimiguulimmilluunniit aallartitsisoqarsinnaasimanngilaq. Alluitsup Paanili qatserisartut sisamaallutik ippassaq unnukkut sapiiseqalutik annaassiniariartorsimapput, anorlileriartoraluartorlu sikorsuit akulloqquallugit angut qiulivissoq ullaassaq nalunaaqutaq marluk qeqqarluinnartoq annaassinnaasimavaat. Nanortalimmi politiit iluatsitsineq nuannaarutigaat, oqaatigaalli piniartoq radioqaranilu mobilimik nassataqarsimanngitsoq.
Narsarsuarmi nanorsiulersimagaluarput. Nannup tumai takuneqarsimapput, Narsarsuarmiillu ungasiartumi nanuusorisaq takuneqarsimavoq, sunaaffa angutikuloorsuaq.
Maniitsumi orsersortarfimmut matu aserorlugu tillinniartoqarsimavoq, aningaasallu karsimiittut 2.663 koruunit tillinneqarsimallutik. Tillinniartup kinaasusaa ingerlaannakanneq paasineqarumaartoq Maniitsumi politiit ilimagaat.
Qeqertarsuarmi angutit marluk ullut 14-it matuma siornagut persuttaasimasutut tigummineqartut eqqartuussivimmi sassartinneqarput. Angutip aappaata, 20-inik ukiullip, toqqusassiisimanini pillugu qaammatini pingasuni pinerluuteqarsimasut inissiisarfianniittussanngortinneqarnini akueraa.
Sassartinneqartup aappaa angut, siornatigut 13-eriarluni persuttaasimasutut pinngitsuutinneqarsimasoq, ulluni 40-ni pinerluuteqarsimasut inissiisarfianiittussanngortinneqarpoq. Qeqertarsuarmili politiit suliaq Nunatta Eqqartuussivianut suliassanngorteqqippaat.
Qaanaami pisiniarfimmi imigassanik assigisaanillu tallimanngormat tillinniartoqarpoq, kikkulli taamaaliortuunersut ingerlaannaq politiit paasimmassuk tillitat arsaarissutigineqarput.
