Sapaatip akunnerata naanera Nuummi politiinut ulapaarfiuvoq
Tallimanngorneruinnartoq angut 41-nik ukiulik nuliaminut averusersimasaminut nakuusersimanini pissutigalugu inatsisit tunngaviusut naapertorlugit killisiorneqarnermini sapaatip akunnerini sisamani tigummigallagassanngortinneqarpoq.
Arnaq 30-nik ukiulik inatsisit tunngaviusut naapertorlugit ippassaq killisiorneqarnermini savilersorluni toqutseriarsimasutut sapaatip akunnerini sisamani tigummigallagassanngortinneqarpoq. Taassuma eqqartuunneqarnini Nunatta Eqqartuussivianut ingerlateqqippaa. Toqoriarneqartoq tassaavoq angut 52-inik ukiulik, taannalu arfininngornerup ullaavani pisumik nalunaarutiginnittuuvoq. Inuunerminik navianartorsiunngilaq, taamaattorli nakorsiartarfimmi suliarineqarsimalluni.
Biilinik nioqqutissanik assartuutinik ingerlatitsisoq 44-nik ukiulik sapaammut unnuaani illoqarfiup qeqqani politiinit unitsinneqarpoq. Malunnartumik imigassartorsimavoq aavigassanngorlugulu tigusarineqarluni. Aavata qanoq imigassartaqartiginera paasinarsippat suliaq kingusinnerusukkut aalajangiiffigineqarumaarpoq.
Aamma Qinngutsinnut aqqutaani aqquserngup assiaqutaata eqqaani inuinnaat biilii tillinneqarsimasut qimaannarneqarsimapput – biilillu biilinit kranilinnit peerneqannginneranni ornigarneqarsimaqalutik. Tillittuusimasoq kinaassusersineqanngilaq.
Aammattaaq illumi eqqissiviilliornerit 18-it, aalakoortut nukillaaqqasut qulingiluat, aqqusinermilu eqqissiiviilliortut pingasut nalunaarutigineqarsimapput.
