Sapaatip akunnerata naanera nunatsinni eqqissisimasoqakannersimavoq
Politiit isumaat naapertorlugu nunatsinni sapaatip akunerata naanera eqqissisimanakannersimavoq. Nuummi politiit ulapaarsimagaluaqisut, taamaattoq ulapputaat tassaanerusimapput angerlarsimaffinni eqqissiviilliornerit inuillu aalakkuttut.
Aammali illuni angallatinilu tillinniartoqarsimavoq, isumaginninnermut tunngassuteqartunik marlunnik pisoqarsimavoq, soorlu tallimanngornerup unnuaani sanilerisat nalunaarutigisimammassuk, meeqqat pingasut inigisami angerlarsimaffimminni kisimiittut.
Ilulissani unnuaq persuttaasoqarsimavoq, kamaattullu arlallit saammarsarneqartariaqarsimapput. Politiit pigaartuat malillugu, sapaatip akunnerata naanera nalinginnaasumik ingerlasimalluni.
Timmisartuaraq arfineq-marlunnik issimasulik, qangattarsimatsiaannarluni aquutilliorluni Kangerlussuarmut uterluni mittariaqarsimavoq.
Ajornartoorluni mittariaqarneq ajornartorsiornertaqanngitsumik pisoq, politiinit nalilerneqarpoq.
Tunumi tamarmi sapaatip akunnerata naanera eqqissisimanarsimavoq, imigassartorsimasut nalinginnaasut eqqaassanngikkaanni.
Qaqortumi eqqaavissuup ikuallaleraluarnera kisimi uisakajaartitsisimavoq. Piaaraluni ikuallatsitsisoqarsimanersoq politiit suli oqaatigisinnaanngilaat.
