Assi: Ane-Marie Petersen

Arajutsivigit? Sapaatip akunnerani nutaarsiassat pingaarnerit

Politikkerit partiiminniit sapaatip akunnerani matumani anisut allallu partiimut tikilluaqquneqartut KNR.gl-imi allaaserineqarput. Allaaserisanili Camp Century initunersaavoq.

Per Rosing-Petersenip Partii Inuinit aninera ataasinngornermi KNR.gl-imi allaaseraarput. Taanna qaammatini marluinnarni partiimi siulittaasooreerluni anivoq. 

Rosing-Petersenip Partii Inuit Partii Nalerarlu kattutseriaraluarnerisa kingorna Partii Inunnit ilaasortaajunnaartoq paasinarsivoq. Tamannali iluatsinngilaq kinguneranillu Partii Inuit siulersuisuini ilaasortat arlallit tunuarput.

Rosing-Petersen partiimut anisitaaffiginikuusaminut, Partii Naleqqamut, ullualuit qaangiuttut utertoq nalunaarutigineqarpoq.

Qamuteralannik ajutoortoqarsimaneranik ataasinngornermi aamma nutaarsiassaqarpoq. Uummannap eqqaani inuit marluk annertuumik ajoqusersimapput. Pisoq misissorneqarmat qanorpiaq pisoqarsimanersoq politiit oqaatiginngilaat.

Camp Centurymi atomimik nukissiorfiup nillusarnissaanut erngup atorneqartup sermersuup iluanut toqqaannartumik kuutsinneqarsinnaaneranut USA danskit naalakkersuisuinit akuerineqarsimasoq KNR-ip marlunngornermi oqaluttuaraa. Malitsigisaanillu oqaluttuat itisiliisut saqqummiunneqartut atuarneqarsinnaapput:

Marlunngornermi nutaarsiassat saqqummersut ilagaat; Visit Greenlandimi pisortap Anders Stenbakkenip atorfimminit soraarnera. Taanna ukiuni arfineq-marlunni pisortaareerluni soraarnissani aalajangiussimallugu KNR-imut oqaluttuarpoq. 

Ilisimatusarfimmi rektori, Tine Pars, peqqissutsimut naalakkersuisoqarfimmi pisortanngulersoq apriilillu aallaqqaataani aallartissasoq KNR-ip marlunngornermi oqaluttuaraa. 

Kommuneqarfik Sermersuup Namminersorlutik Oqartussallu tuttutassiissutinik tunioraanerat Aalisartut Piniartullu Kattuffiata isornartorsiorpaa. 

Tassami periaaseq pissutigalugu piniartut pisassinneqarsimasut ilaat pisassaminnik tuniniaasarput.

Atassummi siulittaasuusimasoq Knud Kristiansen Siumumut ilaasortanngorsimasoq Siumumi siulittasoq tusagassiuutinut pingasunngormat nalunaaruteqarpoq. 

 Ole Dorph, Qaasuitsumi borgmesteri, qineqqusaaqqinnianngitsoq KNR-ip sisamanngornermi oqaluttuaraa. 

Tallimanngornermi Bachelorinngortut 45-pput kandidatinngortullu arfineq-pingasut allagartartaarmata inuit nuannattunnguupput. Assit takukkit: 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl