Sapaatip akunnerani 18-imi imigassaq pillugu oqallittoqassaaq
Kommuneqarfik Sermersuumi Inuunerissaasoq oqarpoq, innuttaasut Uge 18-mi allarpassuarnik sammisinneqartalernerat pissutigalugu, Nuummi Uge 18 sapaatip akunneranut 16-mut nuunneqartoq. Paarisa oqarpoq Uge 18 sapaatip akunnerani 18-mi aamma inissaqartariaqartoq. - Qaammat maaji pisoqarfiusaqaaq, aamma Uge 18 inissaqarpoq sapaatip akunneranut allamut nuunneqanngikkaluarluni. Gør Maj Sund aatsaat ukiut kinguliit aallartippoq. Paarisami konsulenti Berti Bourup oqarpoq. Berti Bourup aamma isumaqarpoq Naalakkersuisut oqariartuutaat ataqqineqartariaqartoq, tassa sapaatip akunnerani 18-mi innuttaasut peqqissuunissaannut 2012-imut iliuusissanut anguniakkanullu naleqqiullugu sumut killittoqarsimaneranik kommunini oqallisigeqqusaq.
- Uge 18-nip oqariartuutaa tapersersorlugu ingerlaqqinniartariaqarpugut, tassami Naalakkersuisut siunniussarivaat Uge 18-mi imigassaq pillugu oqallittoqartassasoq. Kommunit ataasiakkaat allanngortitsiniarunik tamanna namminneq akisussaaffigissavaat, taava isumaqassanngillat aningaasanik tapiiffigineqartassallutik.
Berti Bourup taama oqarpoq. Nangillunilu oqarpoq Kommuneqarfik Sermersuup ukioq manna iliuusaa eqqumiiginartoq.
- Uge 18-ip isumaanik uniuutsitsisutut oqaatigineqarsinnaapajaarput, tassami Uge 18-nip isumagaa, inuusuttut 18-nik ukioqaleraagamik imigassanik pisisinnaalertarmata aammalu angajoqqaaminnit toqqaannartumik akisussaaffigineqarunnaartarmata.
Kommuneqarfik Sermersuumi Inuunerissaasoq Linda Gundel oqarpoq, Uge 18-p sapaatip akunneranut 16-mut nuunneqarnerata pissutaasut ilagigaat sapaatip akunnerani 18-mi akissarsiffiusarmat imerfiugaatsiartarlunilu. Berti Bourup ima akerliliivoq:
- Qaammatit tamaasa akissarsisoqartarpoq. Uge 18-nip siunertarinngilaa iminnginnaveersaarnissaq, inuup nammineq tamanna aalajangigassaraa. Berti Bourup naggasiivoq.
Sulisartut ulluata, maajip aallaqqaataata, aalakoornartup atugaanerata oqallisigineqartarnissaanut Paarisap piukkuppaa, oqarlutik sullivimmi imigassamik atuineq sulisartut akornanni oqallisigineqartariartoq aammalu pingaaruteqartoq.
