Sapaatip akunnera tulleq aasaq takkutissaaq
![](/sites/default/files/styles/image_934x467/public/article_images/tasersuaq_foto_carl_egede_630_2.jpg?itok=kyHtMEzy)
Issisiut piffissami kingullermi kitaani 0-lup eqqaaniiginnavittoq silammut qiviarnermi imaliliortoq takullugu anersaaruluttoqartannguatsiaqaaq. Maannali ilimanarsivoq aasaq sapaatip akunnera tulleq takkutissasoq.
- Silaannaq kissartoq Kalaallit Nunaannut takkutissaaq ataasinngorpallu Nuummi qulit 20-illu akornanni kiassaaq, silasiortoq Gorm Larsen DMI-mi nunatta silassaanik nakkutiginnittoq qujasaavoq.
Silaannaq nillertoq nunatta nalaaniittoq piffissami kingullermi silap unerisimanani pueqqorneranut pissutaasoq nungukkiartulerpoq silaannarmillu kissartumit taarserneqassalluni.
- Ilimarpoq aqagu ualineraniit silagissiumaartoq silaannarlu kissartoq kitaanut takkutissasoq silaqqissillunilu tamannalu sapaatip akunnera tulleq ilanngullugu atuutissaaq, Gorm Larsen oqarpoq.
Nuup saniatigut illoqarfiit allat aamma silaqqissiortussanngorput. Ilulissat aamma Sisimiut ataasinngorpat qulit sinnerlugit kiassapput.
Inuillu ilaat Europami feeriarnissamut poortuilereersut nalaattussaavaat Danmarkimi silaginnerata atuutiinnarallarnissaa. Ullunili kingullerni 25-it angullugit kiattarnera qaangiutiimissaq. DMIp ilimasaarutaa malillugu sapaatip akunnera tulleq panernarluni Danmark 15-it missaannik kiassaaq.
- Nuuk aamma København sapaatip akunnera tulleq kiaqatigeeriaannaapput, Gorm Larsen oqarpoq.