Sapaatip akunnera qaangiuppat inuaqerpalaassaqaaq

Unnuit kulturisiorfiit aqqaneq aappassaat qanoq peqataaffigineqartigissanersoq suli nalunarallarpoq. Illoqarfiit assigiinngitsut unnuk taanna pisussat unnuk kulturisiorfiup nittartagaanut ikkutillattaalerpaat. Maannali qularnarunnaarpoq Nuummi unnuk taanna pisussarpassuaqartoq.

- Assut nuannaajallannarpoq suliffeqarfiit ingerlatsiviillu assigiinngitsut peqataaqqinniarmata taakkunanngalu arlallit pisussanik nutarterisimapput, unnuk kulturisiorfimmi ataqatigiissaarisoq Elisa Jeremiassen KNR.gl-mut oqarpoq.

Unnuk kulturisiorfik siullerpaamik 2001-mi nunatsinni pivoq tamatumalu kingorna illoqarfinnut nunaqarfinnullu siaruaassimalluni.

Nuummi pisussat nutaat ilagaat Issittumi sakkutooqarfik umiarsuaq nakkutilliissut Ejnar Mikkelsen pulaarneqarsinnaassalluni. Pisiniarfeqarfissuaq Nuuk Center ammarnermi kingorna aamma peqataarngaartussanngorpoq namminerlu sceneqarumaarluni.

Tele konference atorlugu aamma unnuk kulturisiorfimmi attaveqartoqassaaq. Tassani Nuup Eqqartuussiviani telekonference atorlugu Ilulissat Eqqartuussiviat attavigineqassaaq tassanilu eqqartuussisoqartuusaassalluni.

Piffissami sivitsortumi Nuummi silageqattaarpoq aaqqissuisullu pissanngatigaat unnuk kulturisiorfimmi januarip 26-ianni silap qanoq ikkumaarnera.

- Aaqqissuisut ataasiakkaat namminneerlutik aalajangerumaarpaat sila ajussappat aaqqissuussassatik ingerlatiinnassanerlugit, Elisa Jeremiassen nassuiaavoq.

Unnuk kulturisiortarnermik isumassarsiaq Sverigep kujataani Skånemi illoqarfimmi Lundimi 1985-mi aallartippoq. København siullerpaamik 1993-mi unnuk kulturisiortitsivoq Nuummilu siullerpaamik 2001-mi unnuk kulturisiortoqarpoq.

Nunatsinni unnuk kulturisiorfik pillugu annerusumik uani paasisaqarsinnaavutit: http://www.kulturnat.gl/kulturnat/