Sapaatip-akunnera 18 aallartippoq

Sapaatip akunnera 18 ini tassaavoq imigassamik aanngajaarniutinillu atuinaveersaarfik. Namminersornerullutik Oqartussat Peqqissutsimut Pisortaqarfiani innuttaasuni peqqissuunissamut immikkoortortamit Paarisa-mit kommunit kajumissaarneqarput innutaasunik oqallititseqqullugit. Imigassartortarneq imigassartortarnermilu ileqqut oqallisigineqarnissaat kajumissaarutigineqarpoq.

Misiligutitut sammisassatut qulequtaapput ilagisariinneq qiimasuuneq kajuminnerlu.

Suliniut ajunngitsuuvoq, sapaatilli akunnera ataaseq naammanngilaq, Nuummi timersuutinik niivertarfimmi Pikkori Sport-imi sulisoq, Morten Funch isumaqarpoq. Nuummi suliffeqarfiit arlalipassuit suleqatigalugit qaammat maj-i naallugu peqqinnermik taallugu aaqqissuusinernik assigiinngitsunik pilersaarusiorput. Timersuutit assigiinngitsut 16-init ingerlanneqassapput, peqataanerlu akeqassanngilaq. Ukioqqortussuseq qanorlu timersorsimatigineq apeqqutaatinneqanngilaq.

Utoqqaanerusunut kikkunnulluunniimi tamanut ajaappialerluni pisutitsineq ingerlanneqassaaq, kilomeeterimik ataatsimik isorartutigisumik arpatitsineqassaaq, meeqqat mikinerit peqataaffigisinnaasaat, biilinillu angallaffiunngitsumi ingerlanneqartussaq. Maajip qaammataani sapaatip akunnera kingulleq ilaqutariinnut eqaarsaartitsineq timigissarnerlu ingerlanneqassaaq timigissartarfimmi Fit and Fun-imi,

kikkut tamarmik peqataaffigisinnaasaannik cykelertitsisoqassaaq Nuup illoqarfianiit Nuup ilaanut Qinngorpumut. Sakkortunerumaatullu timersuutit assigiingitsut pingasut ingerlaannartumik timersuutigineqartussat aaqqissuussinermi ilanngunneqarput, tassalu Mini Triatlon-imik taaguuteqartinneqartoq, tassalu 400 meterinik takutigisumik nalunnguarneq 15 kilometerinik isortutigisumik cykkelerneq 4 kilometerinillu isorartutigisumik arpatitsineq Morten Funck suleqatitsinnut Finn Breinholdt Hansen-imut oqaluttuarpoq.

Morten Funch-ip neriuutigaa aaqqissuussineq aappaagu nunarpu tamakkerlugu ingerlanneqarsinnaajumaartoq.