Sapaatip akunnera 18 aallartippoq

Sapaatip akunnera 18, imigassartorfiunngitsoq ullumikkut aallartippoq, sinerissamilu kommuneqarfinni assigiinngitsuni malunnartinniarneqassaaq.

Sapaatip akunneranut imigassartorfiunngitsumut ”Imigassaq oqillinnerlu”, Paarisamit nuna tamakkerlugu qulequtassatut qinerneqarpoq.

Kommuneqarfinni assigiinngitsuni Upernavimmi, Uummannami, Qeqertarsuarmi, Aasianni, Nuummi Nanortalimmilu sapaatip akunnerani matumani pisussat tusagassiuutinut nalunaarutigineqarput.

Pisussarpassuarni ilaqutariit assigiinngitsorpassuarnik sammisassaqartinneqassapput, imigassarlu pillugu oqillitsitsisoqassaaq.

Pisoqarfiusussani amerlanerni timersornerit soorlu silami arsaanneq, pinnguaatit arpannerit illullu iluani imigassartaqanngitsumik nipilersortunik erinarsortunillu tusarnaartitsinerit ilaatigullu aamma naalagiaqatigiinninerit pissapput.

Imigassaq pillugu oqillinnerit eqqarsaatigalugit soorlu Aasianni Nanortalimilu isumasioqatigiittoqassaaq, Nuummilu meeqqat oqariartuutaannik Katuami saqqummersitsisoqassalluni.

Aamma Peqqinnisamut Pisortaqarfik innuttaasut peqqissuunissaat pillugu, Aasianni innuttaasunut maajip pingajuanni, katersortarfimmi unnukkut ataatsimiititsissaaq.