Sap. ak. naanera aalakoorluni biilertunik siumugaqarfiunngitsoq
Piffissap julefrokosterfiusartup nalliussimaarfiani Nuummi politiit aqqusinermi angallattunik nakkutilliineq ingerlappaat. Siornatigut aalakoorlutik biilertut arlallit siumorneqartarput, sapaatit-akunneratali naanerani taamaattoqanngilaq.
Allattoq Peter Troelsen, Simon Uldum
decembarip 09-at 2013 13:14
Politiit angerlarsimaffinni eqqissiviilliornerit arlallit aamma orniguffigaat, taakkulu sapaatit akunnerata siuliani 20-iupput, pisanertullu imigassartortoqarsimanera angerlarsimaffimmi eqqissiviilliortoqarneranut pissutaanerpaavoq. Aammattaaq aqqusinermi eqqissiviilliortoqarsimavoq, aalakoorpallaartut isumagineqarlutik imerniartarfimmilu aamma eqqissiviilliortoqarluni.
Politiit sapaatit akunnerata siuliani suliat 32-t aallartissimavaat. Nakuusertunik suliat quliupput pisortanilu atorfilinnut nakuusernerit marluullutik. Aammattaaq pisiniarfimmut tillinniarnerit tallimaasimapput, pisuttorniarluni pinerluttuliornerit arfineq marluullutik ikiaroornartulerinermillu pinerlunnerit arfineq-pingasuusimallutik.
