Sannassisut takanna, neqeroorniaritsi!

Qaammatini aggersuni imaassinnaavoq mittarfeqarfinni ulapaarnerulersut. Mittarfeqarfinni pilersaarutit assigiinngitsut Namminersorlutik Oqartussat Sanaartornermut aserfallatsaalinermullu aningaasaateqarfia aqqutigalugu tuavisaarneqarsimapput suliffinnik nutaanik pilersitsinissamut alliartortitsinermullu.

Mittarfeqarfiit 17,3 millioner koruuninik suliassanik nutaanik pilersitsinissamut aningaasaliiffigineqarsimapput, anguniagaavorlu ingammik Nuup avataani suliffinnik nutaanik pilersitsinissaq.

Mittarfeqarfinni pisortaq Jens Lauridsen ima oqaluttuarpoq:

-  Pitsanngorsaatissatut suliassat suliarinissaat sivisuumik kissaatigisimavagut, mittarfiit marluk imermik pilersorneqarnerannut pitsanngorsaatissatut,  akunnittarfiillu arlallit aamma pitsanngorsaavigiumallugit. Maanna aningaasassarsivugut, suliassat naammassiniarlugit, ulluinnarni ingerlatsinermut aningaasaliissutit atunngikkaluarlugit, Jens Lauridsen oqarpoq.

Mittarfeqarfiit naatsorsuutigaat Kulusumi Kangerlussuarmilu erngup aqqutaanut nutaanut aningaasat atussallugit. Taasarput kingulleq 2012-mi aserorpoq. Aammattaaq akunnittarfinni Kangerlussuarmi Narsarsuarmilu iluarsartuussinernut assigiinngitsunut aningaasat atorneqassapput.

Suliassat tamarmik piaartumik suliarinnittussarsiuunneqassasut pisortaq oqarpoq.

- Aningaasaliissutinik anguniarneqarpoq Kalaallit Nunaanni tamarmi suliffissaqartitsiniarneq, isumaqarpugullu pilersaarutit piviusunngorteriaannaasut, sulisartut suliffiutillillu amerlanerpaat najukkaminni suliarinnittussarsiuussinerni peqataaniassammata. Neriuppugullu taamaaliorumaartut, piffinni assigiinngitsuni suliassaqartitsineqarniassammat, Mittarfeqarfiit pisortaat Jens Lauriden taama oqarpoq.