Sannarlunneq peqqutaasimasinnaavoq

Tallimanngormat meeqqap inissiani quleriit arferngaanniit nakkarnera sannarluttoqarsimaneranik pisimasuusinnaavoq pinngitsoorneqarsimasinnaangaluartoq.

Nukappiarannguaq 14-nik qaammatilik uani pineqarpoq, Nuummi Tuapannguani inissiat ilaanni quleriit arfernganniit nakkartoq. Tupinnartuliatut ittumik annappoq, tallimanngormalli perulussimaqisoq politiit oqaatigaat. Ullaap tungaa pingaartuusup Johannes Lyberth-ip oqaatigaa peqqinnissaqarfimmit suli allanik tusagaqarsimanatik, meerarli uumavoq.

Nukappiarannguaq Dronning Ingredip Napparsimmavissuani uninngavoq.

Nukappiaqqap ataataata Elias Inûsugtup Namminersorlutik Oqartussat maanna sannarlussimasutut nalunaarutigisimavai.

Elias Inûsugtup ataatsimik ukiulimmut Palu-mut ataataasup, Namminersorlutik Oqartussat Tuapannguani inissiani quleriiaani isumannaallisaanermut piumasaqaatinik malinnissimanngitsutut unnerluutigai.

- Aneerasaartarfiit ungaluisa iikkamut katinneri 16 centimeterinik avissaangapput, naak isumannaallisaanermi piumasaaqaatini allassimagaluartoq 12 centimeteriussasut, ataataq tupassimaqisoq Qanoruumut oqarpoq.

Ilisimaneqanngilaq nukappiaraq avissaanganikkut tassuuna nakkarsimanersoq, nassuiaalli taanna ilimanarnerpaajugallarpoq.

Nukappiaqqap angajoqqaavi suli tupaqqaqaat, Qanoruumullu nangillutik oqaluttuarput:

- Suli annernaqaaq kamannarlunilu, taamaattorli ernerput pillugu nakuuniarsarivugut, Elias Inûsugtoq oqarpoq.

Pisimasoq tupannaqisoq pillugu politiit misissueqqissaarnertik suli  ingerlappaat, taamaattumillu annertunerusumik oqaaseqarsinnaanngikkallarlutik.