- Inuiaqatigiinnik meeqqat tamarmik sunngorusunnerminnik takorluukkaminnik angusaqarfigisinnaasaannik, kikkulluunniit ajunngitsumik inuuneqarlutillu naleqartumik utoqqalinissaat sulissutiginiarpara. Sanna Marin akuersissutigineqarnissaminut akunnialuit sioqqullugit Twitterikkut allappoq.Assi: Scanpix

Sanna Marinip nunarsuarmi naalakkersuisut siulittaasuini nukarlerpaalernissaa akuerineqartoq

Finlandip ministeriunertaava 34-nik ukioqarpoq. Taanna Finlandimi oqaluttuarisaanermi naalakkersuisut siulittaasorisimasaanni nukarlerpaalerpoq.

Finlandip inatsisartuisa – rigsdagip – Sanna Marin ministeriunerulertussatut marlunngornermi akuersissutigaa. Taanna 34-nik ukioqartoq nunarsuarmi naalakkersuisuni siulittaasuusimasuni nukarlerpaalerpoq.

Inatsisartuni ilaasortanit 200-init Marinip toqqarneqarneranut 99-it akuersipput 70-illu akerliullutik, ilaasortat sinneri peqataanngillat.

- Finland ukiuni sisamani pitsaalluinnartunngornavianngilaq, pitsaanerulissaarli. Tamanna sulissutigaarput.

- Inuiaqatigiinnik meeqqat tamarmik sunngorusunnerminnik takorluukkaminnik angusaqarfigisinnaasaannik, kikkulluunniit ajunngitsumik inuuneqarlutillu naleqartumik utoqqalinissaat sulissutiginiarpara. Sanna Marin akuersissutigineqarnissaminut akunnialuit sioqqullugit Twitterikkut allappoq.

AAMMA ATUARUK Sanna Marin nunarsuarmi naalakkersuisut siulittaasorisimasaanni nukarlerpaalersinnaasoq

Sanna Marin 2015-imili rigsdagenimi ilaasortaalerpoq. Taanna siusinnerusukkut angallannermut ministeriusimavoq. Maannalu naalakkersuisut saamerliuniat, partiinik tallimanik, tamarmik arnamik siulittaasoqartut ilaasortaaffigisaat siulittaasuuffigissavai.

Politikkikkut siuttunit tallimanit sisamat 35-t ataallugit ukioqarput.

Allakkerivimmi aaqqiagiinngittoqartoq

Marinip siulittaasuuffik, Antti Rinnep qaammatini arfiniliinnarni atuuffigisaminit naalakkersuisooqatigiinni partiit allat tatiginnikkunnaarnerisa kingunerisaanik sapaatip akunnerata siuliani tunuarneratigut nangippaa.

Naalakkersuisuni eqqissiviilliortoqarnera finskit allakkerivianni Postimi sulinermut atatillugu piffissami sivisuumi aaqqiagiinngittoqarneranit aallaaveqarpoq.

Marinip Finlandimi naalakkersuisuusimasuni ukiukinnerpaalerpoq nunarsuatsinnilu naalakkersuisut siulittaasuanni ukiukinnerpaalerluni.

Tamannali allanngoratarsinnaavoq. Østrigimi siorna upernaap tungaanut kanslererisimasaa, Sebastian Kurz Østrigimi inatsisartunut septembarimi qinersinerup kingornatigut uteqqikkiartulersinnaavoq.

Kurs naalakkersuisuni aaqqiagiinngittoqarnerata kingunerisaanik tunuarnikuuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat