Sanna Marin nunarsuarmi naalakkersuisut siulittaasorisimasaanni nukarlerpaalersinnaasoq

34-nik ukiulik, Sanna Marin nunarsuarmi naalakkersuisut siulittaasorisimasaanni nukarlersaalersinnaavoq. Finlandimilu aatsaat taama inuusutsigisumik naalakkersuisut siulittaasoqalersinnaallutik.

Finlandimi nutaarsiassaqartitsivik YLE taama allaaserisaqarpoq.

Finlandimi socialdemokraatit Sanna Marin ministeriunermut Antti Rinnemut kingoraartissatut partiimit qinigassanngortippaat. Finlandimilu inatsisartut toqqaanermut aqagu marlunngornermi akuersissappata Sanna Marin Finlandimi ministeriusimasuni nukarlerpaalissaaq.

Ukrainimi ministeriuneq Oleksiy Honcharuk ministerini maanna nukarlerpaavoq. Taanna 35-nik ukioqarpoq.

Nunarsuarmi naalagaaffinni ittuusut ministeriunerusullu ukiukinnerpaat pisortatigoortumik allattorsimasuutigineqanngitsut, YLE allappoq. Korealli avannarliup siulittaasua, Kim Jong-Un 36-nik ukioqarpoq, El Salvadorip præsidentia, Nayib Bukule 38-nik ukioqarpoq, New Zealandimilu ministeriuneq Jacinda Ardern 39-nik ukioqarluni, nutaarsiassaqartitsivik paasissutissiivoq.

Finlandip maannamut ministererisimasaata soraarniutini marlunngormat tunniuppaa. Tamanna naalakkersuisuni suleqatigisami Centerpartiip tatiginnikkunnaarnermik nalunaaruteqarnerata kingorna pivoq.

Finlandimi politikkikkut eqqissiviilliortoqarnera Finlandimi allakkerivimmi, Posti-mi sulinermi aaqqiagiinngittoqarneranik aallaaveqarpoq.

Socialdemokraatit naalakkersuisooqatigiit partiit tallimaasut akornanni anginerpaavoq. Partiit tallimat tamarmik arnamik siulittaasoqarput.

Dr.dk-p allaaserisaa naapertorlugu Sanna Marin ”ilaqutariinnit suiaaqatigiinni” tassa anaanamini anaanamilu aappaani arnami najugaqarluni peroriartorpoq, Sanna Marinilu ilaqutariinni siulliullu ilisimatusarnermik ilinniagaqartuulluni.