Sanilliussineq eqqumiigaat

Inatsisartut Inuussutissarsiornermut ataatsimiititaliaani siulittaasoq, Naaja Nathanielsen, Inuit Ataqatigiit isumaqarpoq, sulisoqarnermi inuit pisinnaatitaaffii unioqqutissanngikkivut. Ataatsimiititaliami ilaasortaq, Karl Lyberth, Siumut isumaqarpoq nunat allamiut akikitsullu, aallartisarnermi sulisorissallugit ajoqutissaqanngitsoq.

Greenland Developmentip nalunaarusiarititaani allaaserineqarpoq, nunani allani aluminiumik aatsitsiviliornerni nunat allamiunik akikitsunillu sulisoqartarneq naliginnaasuusoq.

Nalunaarusiami nunat allaaserineqartut tassaapput, De Forenede Arabiske Emirater, Qatar, Saudi Arabia aamma Malaysia.

Nunanut taakkununnga assersuutissalluta isumaqanngivissortoq, Naaja Nathanielsen, Inuit Ataqatigiinneersoq isumaqarpoq.

- Nalunaarusiaq aalajangiisinnaaninnut tunngavilersuutinik pitsaanerulersitsinngilaq. Nalunaarusiami Australia eqqaassanngikkaanni nunat allat taaneqartut inuit pisinnaatitaaffiinik unioqqutitsipput. Nunallu taakku ilisimaneqarput sulisartunut pissusiluttuusut, Naaja Nathanielsen oqarpoq.

Siumup Inatsisartuni ilaasortaatitaa, Karl Lyberth aamma isumaqarpoq Nunatta sanillersuunneqarnera apeqquserneqarsinnaagaluartoq.

- Taamatut sanilliussineq apeqquserneqarsinnaagaluarpoq, kisianni taama iliorsimapput taannalu aallaavigalugu isummersussaagut taava, Karl Lyberth oqarpoq.

Oqaloqatigisattalu isumaqatigiinnerat, taama taaneqarsinnaappat, tamaanga killeqarpoq.

Nunat allamiunut sulisartunut akissarsiaritittakkap minnerpaaffissaanik siunnersuuteqarusunnani, nunat allamiut akikitsullu sulisorisarnissaat ajornartorsiutaasariaqanngitsoq, Karl Lyberth isumaqarpoq.

- Aatsitsivimmut pilersaarutit eqqarsaatigalugit, taanna taama annertutigisoq aammalu taama immikkuullaritsigisoq, allatut ajornaqaaq nunat allamiunik sulisartunik akikitsunik atuisariaqarpugut, taamaaliussaagut suliffiissuup aallartisarneqarnerani. Taamaattumik tamatumunnga tunngatillugu nalunaarusiap atuareerneratigut isumaga allanngunngilaq, Karl Lyberth taama oqarpoq.

Nunat allamiut sulisorissagaanni taakku atugarisaat eqqarsaatigalugit pitsaasumik isumaqatigiissusiortariaqartoq, Naaja Nathanielsen isumaqarpoq, aammattaarlu isumaqarluni nunanut allanut nunarput assersuunneqassanngitsoq.

- Nunarput nunanut allanut inuit pisinnaatitaaffiinik soqutigisaqanngitsunut assersuunneqassanngilaq. Taamaattumik sulisartunut nunanit allamiunut nunatsinnillu sulisartunut akissarsiaritinneqartussat pitsaasuusariaqarput suliffimmilu atukkat pitsaasuusariaqarlutik. Kisianni soorunalimi akileraarutit eqqarsaatigalugit assigiinngitsunik akileraarusiisoqartarnissaa ajoqutissaqartinngilara, Naaja Nathanielsen oqarpoq.

Siumumit aamma Inuit Ataqatigiinnit maannamut isummerfigineqarusunngitsoq tassaavoq, nunat allamiunut sulisorilerumaakkanut akissarsiaritinneqartartut qanoq minnerpaaffeqarnissaat.

Nalunaarusiami Australiami pissutsit eqqartorneqarmata, Australia kisiartaalluni, nunat allamiunik sulisartoqarnermi taakkununnga akissarsiaritittakkat minnerpaaffilerneqarsimapput annertugaatsiartunillu akissarsiaqartinneqarlutik aammalu Australia kisiartaavoq akissarsianit akileraarusiisarsimasutut.