Sangunerliorneq apornermut pissutaavoq

Nuup umiarsualiviani Royal Arctic Linep pajuttaataata Arina Arcticap russit umiarsuaannit ippassaq unnukkut kaluarneqarnera, sanngorliornermik peqquteqartoq, Nuummi umiarsualiviup pisortaata John Rasmussen-ip radioavissimut uppernarsarpaa.

Russit umiarsuaat Razna, Pilersuisup uuliamik assartuisitaa, Nuup umiarsualivianut ippassaq unnukkut pulajartortilluni, umiarsuarmut allamut Arina Arcticamut umiarsualivimmi talinngasunut kalluuttoorpoq, tamannalu Arina Arcticap putunngikkaluarluni imilluttoorneranik kinguneqarpoq. Tamannalu russit umiarsuaata sanngorliorneranik peqquteqartoq, Nuup umiarsuliviani pisortaq John Rasmussen oqarpoq.

Russit umiarsuaata umiarsuaq alla, tassa Pajuttaat sanngorliornermini aamma apunngisungarsimagaa, John Rasmussen oqarpoq.

- Russit umiarsuaata, sinerissami umiarsualiveeqqanut tulanniarnermi naleqqulluinnartunik, aqumigut siumigullu sarpeqannginnera sanngorliornermut peqqutaasimavoq, tamannalu Raznami naalakkap nassuerutigereeraa, John Rasmussen oqarpoq.

Russit umiarsuaat Arina Arcticami innarlernernut akisussaatinneqassaaq.

Taamaattorli ajoqusernerit annikitsuinnaammata Arina Arcticap ukiortaareerput pajuttornini ingerlateqqiinnassagaa John Rasmussen oqarpoq. Pilersuisumi avataanit tikisitanut pisortap Jens Bonfils-ip uppernarsarpaa Russit umiarsuaata Arina Arcticamut apornera sanngorliornermik peqquteqartoq. Oqarporlu aporneq pillugu Raznap naalagaa Sisimiut Kredsrettiani aqagu tusarniaaffigineqassasoq.