Sangujoraarluni biilertoq tigusarineqartoq
Sapaatiummat ullaassakkut nal.03.55 biili Nuummi 400-rtalikkut sangujoraaqisoq politiiniit naammattoorneqarpoq. Politiit biilertoq unitsippaat, paasinarsivorlu angut 49-nik ukiulik aalakortoq aquttuusoq.
Politiit angutip promillia 2.66-itut uuttorpaat. Imigassartorsimalluni biilerneq inerteqqutaalertarpoq 0.5 qaangerlugu promilleqaraanni. Inuk marluk qaangerlugu promilleqartilluni imminut aqussinnaanera killeqartarpoq, toqunartumillu aap akoqalernerani ersiutaasartut pigisarlugit.
- Angut tigusarineqarpoq, aaversipporlu. Promillivia paasineqariarpat ilimanarpoq annertujaamik akiligassarsitinneqarumaartoq, biilersinnaanermullu allagartaata sivisuumik arsaarinnissutigineqarnissaa ilimanarluni, Nuuk Politiivi nalunaarput.
Nuummi inuk alla aamma sapaatip akunnerata ingerlanerani imigassartorsimalluni biilersimasutut pasineqarluni tigusarineqarpoq.
Nakuusernerit ikilisut
Naak akissarsisoqarnikuugaluartoq tusarnaartitsinerillu Nuummi arlqaraluartut sapaatip akunnerata naanera eqqissisimakannersumik ingerlasimasoq politiiniit oqaatigineqarpoq. Nakuusernerit pillugit nalunaarutiginninnerit ikilisimasut Nuummi Politiinit nuannaarutigineqartut ilagaat.
Ukioq manna qaammatit siulliit arfineq marluk nakuusernerit unnerluutigineqartut agguaqatigiissillugit qaammammut 24-iusimasut politiiniit nalunaarutigineqarpoq. Aggustimili qaammat ataatsip ingerlanerani nakuusernerit unnerluutigineqartut apparsimapput qulit nalunaarsorneqarmata, septembarimilu nakuusersimanermut unnerluutigineqartut 18-iupput.
- Nuannaarutigaarput nakuusernerit unnerluutigineqartut ikilisimammata, taama Nuummi Politiini politikommissæri Niels Nyvang oqarpoq.
Nakuusernerit amerlanerpaartaat angerlarsimaffinni pisarput, najugaqatigiittut aaqqiagiinngissuteqarneranik tunngaveqartarlutik, amerlasuutigullu aamma imigassartorsimaneq pissutaaqataasarluni.
- Taamaattumik inuit kajumissaaqqikkusuppagut imminnut pitsaasumik pissusilersortaqullugit taamaasilluni oqqannerit nakuusernermik kinguneqarsinnaasut pinaveersaartinneqarsinnaammata, Niels Nyvang oqarpoq.
2010-mi nakuusernerit pillugit unnerluutiginninnerit 274-it politiit suliariaat, 2011-milu nakuuserit pillugit unnerluutiginninnerit 232-it nalunaarsorneqarsimallutik.
