Sandgreenip qaaqqusaasimannginneq tunngavilersuutigaa
Naak Siumut tamakkiisumik ilaasortaanissamik partiimi siulittaasuata erseqqissumik nalunaaqqugaluaraani, Enok Sandgreen Qaasuitsup Kujasissuani ikaarsaariarnermut ataatsimiititaliami Siumup gruppiani peqataaniannginnini aalajangiusimavaa.
Siumumi ilasortaanini aamma suli attappaa.
Siumup aamma Inuit Ataqatigiit Enok Sandgreen pinnagu Inuit Ataqatiinneersoq, qinersinermilu taaguunneqarnerpaaq, Ane Hansen borgmesterissatut toqqarpaat.
Enok Sandgreenip suleqataaniannginnerminut, Inuit Ataqatigiit Siumullu ikaarsaariarnermi ataatsimiititaliami suleqatigiinnissamik isumaqatigiinniarneranni qaaqqusaasimannginnini tunngavilersuutigigaa, Qaasuitsoq Kujallermi Siumumi siulittaasoq, Jakob Ludvigsen, KNR-imut nassuiaavoq:
- Taanna isumaqarpoq, Siumut Inuit Ataqatigiillu isumaqatigiissutaat unioqqutitsinerusoq. Enok Sandgreen matumani qaaqquneqarsimanngilaq, taamaasilluni isumaqatigiinniarnerni peqataanani, Jakob Ludvigsen KNR-imut oqarpoq.
Pingaarnertulli tunngavilersuutini uppernarsarsinnaanngilaa, qaaqqusaasimanerlunimi qaaqqusaasimannginnerluniluunniit naluaa.
- Allamut nooqqammeerpugut, mailikkut allagarsiakka suli atuanngilakka ataatsimiigiarnissamullu qaaqqusissutinik nassitsissimanersunga suli paasinngilara, Enok Sandgreen KNR-imut oqarpoq.
