Sander: Danmarki Qalasersuarmik soqutiginnippoq
Ilisimatusarnermut ministeri Helge Sander neriuppoq, danskit ilisimatuut qaammatip tulliata ingerlanerani nuna sorleq Qalasersuarmut oqartussaassuseqalissanersoq paasinarsitikkumaaraat. Sanderip taama oqarnermigut russit ippassigami immap naqqani erfalasuliinerat oqqassaarinerinnartut nalilerpaa.
Qalasersuarmi immap naqqata uuliamik gassimillu pisuussuteqarnissaa ilimagineqartarpoq, taamaattumik danskit ilisimatuut Issittup imartaanut sapaatiuppat aallarunik misissuilerlutillu, paasissutissanik sukumiisunik angerlaassiumaartut, Ilisimatusarnermut ministerip neriuutigaa.
- Sikuijuitsup avannarliup uuliamik gassimillu nassaassaqarneranik tusakkat tutsuiginarluinnartut, soorunami Danmarkip, Qalasersuarmi oqartussaaffeqalernissamik soqutiginnittorujussuanngortippaa, Helge Sander oqarpoq.
Qalasersuarmi eqqaanilu nunarsuarmi uuliap qallorneqartartup sisamararterutaa nassaassaasoq ilimagineqarpoq.
Danmarkimi oqartussat ilisimatusarnissanut 2010-p tungaanut 230 millioni koruuninik immikkoortitsisimapput, aningaasallu taakku Qalasersuup immap naqqatigut nunavimmut atasortaata killingata sumiinneranik paasiniaanermut atorneqassapput.
- Paasissutissat pigiligassagut Naalagaaffiit Peqatigiinnut 2014-imi, tassa ukiut arfineq-marluk qaangiutsinnagit tunniutissavagut, neriuppugullu taamanikkussap tungaanut misissuinissanut aningaasaliinerit ingerlaavarumaartut, ministeri nutaarsiassaqartitsivimmut Ritzau-imut oqarpoq.
Danmarki Nordpolilerngusaannermut akuliunniunnianngikkallartoq, Statsminister Anders Fogh Rasmussen aviisi Politiken-imut ullumi oqarpoq.
- Qalasersuarmik piginnittuulerumallutik nunat tutsiuttarnerat pitsaasumik kinguneqarnavianngilaq. Ilisimatuujunngikkarluarlunga isumaqarpunga, Nordpoli nunarsuup tamarmi pigigaa. Ulluni makkunani Qalasersuup immap naqqani nunavimmut atasortaata killinga misissugaavoq, soorunalumi paasisat pissangalluta utaqqissavagut, Statsminister Anders Fogh Rasmussen partiip Venstrep Haderslevimi aasaanerani ataatsimiinnerani oqarpoq.
