Sanasunik polenimiunik tikisitsinissaq pisariaqanngilaq

Nuummi sanaartorfiit ilaanni GGC-mi kalaallit sanasutut sulisut soraarsinneqareersullu, sanasut Polenimiut tikisinneqarput.

Taamatut pisoqarnera SIK-p siulittaasuanit Jess G. Berthelsen-imit eqqunngitsuliornertut nalilerneqarpoq. Nunatsinni suliffissaaleqisut maannakkut

8 procentiupput, sulisitsisullu sanasunik sulisartunilluunniit allanik nunanit allaninngaaneersunik ajornanngippallaamik tikisitsisinnaanerat SIK-mit iluarineqanngilaq.

SIK-p siulittaasua Jess G. Berthelsen aamma isumaqarpoq, sulisartunik tikisitsiniartoqartillugu, Nuup Kommunea sullissinermini sanngiippallaartoq, tikisitsisinnaanerlu eqqarsaatigalugu Nuup kommunea sulisitsisunit ajornannginaarneqarpallaartartoq.

Tikisitsisinnaanermut inatsit sukaterneqarnerusariaqartoq SIK-p siulittaasua Jess G. Berthelsen aamma oqarpoq. SIK-p isumaa aamma naapertorlugu Nuummi sanasut eqqunngitsoq aallaavigalugu soraarsinneqarsimammata SIK-p suliaq ingerlateqqissamaarpaa.