Sanami unnuaq ikuallanneq ajoqusiingaatsiarpoq

Illuaraq pujortartarfiliaq Dronning Ingridip Napparsimmaviata errorsisarfiata silatinnguaniittoq unnuap qeqqata missaani ikuallattoq qatserisartunut nalunaarutigineqarpoq.

- Ikuallanneq ima sakkortusimatigaaq, allaat errorsisarfiup qaliarsua innermik ajoquserujussuarluni, Nuummi politiit oqarput.

Qatserisartut unnuap qeqqata qaangilaarnerani ikuallattumik qatserileramik, inneq ullaaq arfinernut qiteqquttoq aatsaat qamissinnaasimavaat.

Ikuallannermut suna pissutaasimanersoq suli ilisimaneqanngilaq, politiilli pissutaasinnaasut marluk maanna misissorpaat.

Nuummi politeeqarfiup pisortaa Niels Nyvang oqarpoq, illuaqqami pujortartarfiliami arsakoorfik ulikkaarpallaarluni ikuallalersimasinnaasoq imaluunniit ikuallatsitsisoqarsimasinnaasoq. Ikuallannermik aallartitsissutaasimasoq paasiniarlugu teknikki atorlugu maanna paasiniaasoqarpoq.

- Kajumissaarutigerusupparpulli, arsakoorfiit silamiittut imaartarnissaat eqqaamaneqassammat, Niels Nyvang oqarpoq.

Peqqissutsimut Naalakkersuisoqarfiup ullaap tungaagut nalunaarutigaa, errorsiviit ullaaq manna ingerlasut sulisullu saliillutik imiiaallutillu aallartereersut.

- Pisumi taama ittumi upalungaarsimanitta pitsaanerpaamik ingerlanera paasillugu naammagisimaarnartorujussuuvoq. Qujanartumik ikuallanneq inuit inuunerannut arlaannaatigulluunniit ulorianartorsiorfiusimanngilaq, naalakkersuisoqarfiup pisortaa Ann Birkekær Kjeldsen oqarpoq.