Sanami sulisut aqutsisuminnut akerliussutsimik takutsitsiniarput

Sulisut napparsimmaviup peqqinnissamut aqutsisoqarfiata pisortaanit tusaaniarneqanngitsutut misigigamik namminneq politikerit akerliussutsimik takutitsinermikkut eqeersarniarpaat. Napparsimmavimmi sulisussaaleqinerujussuaq pissutigalugu aningaasaliissutit atorneqapallattariaqartarmata, maannakkorpiaq sulisoqanerup tungaatigut iluarsiisoqartariaqalivinnera sulisut naqissuserusuppaat. Pissutsimmi iluarsiiffigineqanngippata tamanna napparsimasunut sulisunullu kinguneqapilussinnaammat.

Peqqinnissamut Ilaqutariinnullu Naalakkersuisoq, Naja Petersen immikkut aningaasaliissuteqarnissamik qinuteqarniarluni nalunaaraluartoq, tamanna napparsimmavimmi sulisut eqqissiallaatiginngilaat, piaartumillu sunniuteqarsinnaasumik sulissuteqarniaqqullugu ualeru nalunaaqutaq sisamanut ingerlaaqatigiinniarlutik.

- Naalakkersuisuniit Napparsimmaviullu aqutsisoqarfiani pisortaniit tusarparput iluarsiisoqassaqqaartoq. Aningaasaliissutilli siniffinut qassinut naammassinnaaneri naatsorsuinnarlugit aaqqiiniartoqarsinnaanngilaq, napparsimasut katsorsarneqarnissaat katsorsartinniarlutilluunniit utaqqisut tusaanngitsuusaarlugit isiginngitsuusaarlugillu. Taamaammat aperigutta sooq pissutsit taamaannersut, ilimagisariaqarparput Naalakkersuisut kiisalu Peqqinnissamut Ilaqutariinnullu Naalakkersuisoq, eqqunngitsunik paasissutissinneqartartut, nakorsaaneq ataatsimiinnermilu aqutsisuusoq, Knud Erik Kleist oqarpoq.

Sulisut sinniisuat, peqqissaasoq, Kit Bergmann aamma oqarpoq sulisut tusaaniarneqanngitsut.

- Napparsimmaviummi aqutsisoqarfiani pisortat oqaloqatigigaluarlugit iluaqutaanngilaq, oqaannartarput ajalusoortoqalinngitsoq. Taamaattumik maannakkut Naalakkersuisut sunniuteqalertorsinnaasumik qanoq iliuuseqanngippata ajortorujussuarmik kinguneqarnissaa aarleqqutigalugu, Kit Bergmannip oqaatigaa.