Sanami sanaartorneq aqunneqarnerluppoq
Tamanna missingersuutinik 32,4 millioni koruuninik sippuinermik maannamut kinguneqarpoq. Aningaasaqarnermut ataatsimiititaliaq decembarip arfineq-aappaani immikkut ittumik ataatsimiilluni aalajangerpoq, aningaasaliissuteqassalluni.
Naalakkersuisunut ilaasortaq Jens B. Frederiksen naapertorlugu, pissutsit assigiinngitsut arlallit aqutsiunnaartoornermut peqqutaapput. Napparsimasut inissaata missingersuusiornerani aningaasaliinikinneq peqqutinut ilaavoq. Aamma qaliaq immikkuullarissoq, aatsaat sanallugu misilinneqartoq, pisooqataavoq. Aammali Namminersorlutik Oqartussat aqutsinerat ajorsimavoq.
Napparsimmavissuup allissutissaanut 200 millioni koruunit aningaasaliissutigineqareernikuupput, taakkunannga 140 millioni koruunit A. P. Møllerip nuliatalu Chastine Mckinney Møllerip aningaasaateqarfianit tunissutaapput. Mærskimiillu aningaasaliisut assigiingitsunik piumasaqarlutillu kissaateqarsimapput.
- Taanna pillugu sanaartugassap titartarneqarnera sanaartornerlu ataatsikkut ingerlanneqarput, naalakkersuisunut ilaasortaq Jens B. Frederiksen taama oqarpoq . A.P. Møllerillu aningaasaateqarfiata sunniuteqarusussusia aamma pissuteqarpoq:
- Aamma piumasarinikuuaa sukkanerpaamik suliarineqassasoq naammassineqarlunilu, tassani immaqa Mærsk Mckinney Møllerip nammineq ammaanermi peqataanissaa eqqarsaatigineqarnerulluni, Jens B. Frederiksen nangippoq.
Tassalu aamma A. P. Møllerip piumasaqaataasa kinguneraat, sanaartornermi aqutsisussamik Darmarkimiit qinersineq.
Tamakkualu tamarmik kinguneraat, aningaasaliissutit 32,4 millioninik qaangerneqarmata.
16 millioni koruuni napparsimmavissuup ilassutaanut atorneqassapput, sinnerilu 16,4 millioni koruunit napparsimasunut inissiisarfissamut nutaamut atorneqassapput.
Aningaasat sanaartugassatut pilersaarutinik assigiingitsunit nuussuinikkut, ikililerinikkut aammalu sanartugassanit kinguartoorsimasunit tigusinikkut katersorneqarput.
Nuummi utoqqaat illuani Ippiarsummi pilersaarut, Nuummi Qinngorpumik kigutit nakorsaqarfissaa aammalu nunaqarfinni isorliunerusunilu inissialiornissamik pilersaarutit aningaasaliissutinik tigusiffigineqartunut ilaapput.
- Taava neriuppugut, aningaasaleeqataarusuttunut qanoq oqaloqateqartarnissatsinnik una ilinniarfigisimassagipput. Tulliani aningaasaleeqataarusuttunik takkuttoqarpat ajukkuusaarujussuassanngilagut. Eqqarsaatigisassavarput, sanaartukkat qanoq aqunneqartariaqarnersut, aningaasaqarnermut ataatsimiititaliap siulittaasua, Inuit Ataqatigiinneersoq Naaja Nathanielsen, oqarpoq.