Sanami peqqissaasussaaleqqineq aaqqiiffigigallarpaat
Kisianni Sanami peqqissaasut pisortaat, Maybritt Andersen, naapertorlugu iliuutsit taakkua ullumikkut pissutsinik iluarsiigallarnerusussapput. Aningaasaliissutinik amerliliinissaq siunissamut ungasinnerusumut pingaaaruteqarpoq.
- Akisussaasuusugut ulloq unnuarlu sulisussanut pilersaarusiorneq tigussavarput. Aamma immikkoortortat ilaanni ulapiffiuallaanngitsuni sulisut atukkiukkallarneqartassasut kaammattuivugut. Tamatuma saniatigut peqqissaasut Peqqinnissaqarfimmi maanna sulinngitsut tallimat arfinillit sulilernissaat iluatsipparput, Maybritt Andersen oqarpoq.
Taassuma erseqqissarpaa, iliuusissatut pilersaarusiartik Sana ingerlaannaqqullugu pilersaarutaammat siunissamut qanittumut taamaallaat atuummat. Tassami aqutsisut naapertorlugit Peqqinnissaqarfimmi ajornartorsiorneq, nakorsaatit akiisa, angallannermik aningaasartuutit, Rigshospitalimut aningaasartuutit taartaasartunullu aningaasartuutit qaffakkiartornerannik peqquteqarpoq.
Tamatuma ilutigisaanik inooriaatsimik pissuteqartumik nappaatillit amerliartorput. Tamakkua tamarmik aningaasaqarneq ajornartorsiortippaat, aningaasaqarnerlu sulianut naapertuutissappata, taava politikerit amerlanerusunik aningaasaliisariaqarput.
- Aningaasartuutinut naleqquttumik suunukua suliarissagivut? Massakkutut suut tamaasa suliariniarsarinagit tulleriiaarinissaq pisariaqalerpoq, nalunnginnatsigu aningaasat killeqanngitsumik atorneqarsinnaanngitsut, peqqissaasunut pisortaq Maybtritt Andersen oqarpoq.
