Sanaartukkat innarluutilinnit tikikkuminarnerulissapput

Sukateriniaritsi. Sanaartorneq pillugu inatsisissami illunik innarluutilinnut tikikkuminartunngortitsinissamut immikkoortoq naatsumik taama oqaatigineqarsinnaavoq.

- Innarluutillit maanna sunut tamanut isersinnaaneq ajorput. Taamaammat ersarissumik takuneqarsinnaavoq, nutaamik inatsisiliornissaq pisariaqartoq, Ineqarnermut naalakkersuisoq Jens B. Frederiksen oqarpoq.

Sanaartorneq pillugu inatsisissaq, Nunatsinni siulliusoq, Inatsisartuni siullermeerlugu ullumi suliarineqarpoq. Inatsisissaq sinaakkusiisuussaaq, malittarisassanik atuutereersunik inatsisinnguinerulluni, aammali erseqqissaatitaqarluni.

Assersuutigalugu innarluutilinnut perusuersartarfiliinissamik, sanaartukkamut majuartarfikkooqqaarnani isersinnaanissamik aammalu sanaartukkani marluk sinnerlugit quleriilinni elevatoriliinissamik piumasaqaateqarpoq.

Inatsimmili aamma nutaartaavoq, assersuutigalugu kaassuartakkanut aqqutiliornermi aningaasartuutit, sanaartukkat sinnerata tamarmiusup aningaasartuutigineranut, procentii aalajangersimasumik qulaatissanngimagit. Inatsisissatut siunnersuummut oqaasertaliussani alajangiutinngikkaluarlugu assersuusiunneqarpoq, sanaartukkanut aningaasartuutinit tikikkuminarsaanermut 12 procenti qaangerneqassanngitsoq. Tassalu apeqqutit mikisualukkaat sanaartornissaagaluamut unitsitsissutaasinnaanerat pinaveersimatinneqarpoq.

Kommunit sanaartornissamut suli akuersisartuussapput nakkutilliisussaallutillu, inatsisissamili erseqqissarneqarpoq, kommunit nammineerlutik sanaartortitsisuutillugit, taamaalilutillu marloqiusamik inisisimatillugit, kommunip sanaartornermi nakkutilliititaa mianersortassasoq.

Inatsisissaq ualimut siullermeerlugu suliarineqarpoq, tassanilu Atassutip Siumullu sanaartornermi nakkutilliisarneq pitsaanngippallaarnerarpaat.

- Sanaartornerup nalaani nakkutilliineq pisariaqarluinnarpoq, sinerissamimi sannarlutat takusaasaqaat. Piginnittut aningaasatigut eqqugaajuassangippata,

atuisussallumi peqqinnissakkut aammalu kiassarnermut atuinerulernikkut eqqugaassanngippata, qanoq iliuuseqartariaqarpugut, Siumumeersoq Kim Kielsen KNR-imut oqarpoq.

Ineqarnermut naalakkersuisup Jens B. Frederiksenip siornatigut naalakkersuisuuteqartaqarsimasut maannalu illuatungiliuttut tamatumani isumaqatigai.

- Eqqarsaatit tamakkua ukiut amerlasuut matuma siornatigut piviusunngorsimasariaqaraluarput, naalakkersuisunut ilaasortaq oqarpoq.

Inatsisissatut siunnersuut aappassaaneeqartinnagut Ineqarnermut Attaveqarnermullu ataatsimiititaliami suliarineqassasoq, Inatsisartuni amerlanerussuteqartut suliassanngortippaa.

Ini A/S maanna misissorpaa, Namminersorlutik Oqartussat sanaartugaatai tikikkuminarsisissagaanni qanoq aningaasartornartigissanersoq.