Sanaartugaq ilusinikkiartorpoq
Napparsimasut angerlarsimaffissaat Københavnimiittussaq maanna ilusinikkiartulerpoq. Sanaartugaq nutaaq ulloq aggustip 18-iani napparnersiorneqarpoq, pilersaarutilli malillugit marsimi apriilimiluunnit atorneqalissaaq. Peqqinnissamut Pinaveersartitsinermullu aqutsisoqarfimmi pisortaq Kurt Nielsen taama ilisimatitsivoq.
Allattoq Gedion Storch
aggustip 29-at 2011 10:23
Napparsimasut Københavnimi angerlarsimaffissaat Fælledparkenimiittoq; napparsimasunut angerlarsimaffimmut Brønshøjimiittumut naleqqiullugu amerlanernut inissaqartitsissaaq - init ataasiuttarissat 53-it, namminneq perusuersartarfillit uffarfillillu, kiisalu qanigisanut unnuisoqarnissamut siniffilerneqarsinnaasunik. Aammattaq inissiat sisamat kræftertunut naatsorsuussat immikkoortitat sananeqarput.
Napparsimasut angerlarsimaffissaat nutaaq Peqqinnissaqarfimmit pigineqassanngilaq, akerlianik ukiut 15-it siumut attartorneqassaaq.
Napparsimasut angerlarsimaffiat nutaaq iserterfigineqarsinnaanngorpat, Kalaallit peqqissartut illuat Brønshøjimiittoq tunineqarumaarpoq.
