Sanaartornissamut milliuunit atorneqarput skattilu qaffanneqarluni

Kommuneqarfik sermersuup aningaasanut missingersuutaa saqqummersinneqarmat erserpoq kumuuni aningaasanik arnertuunik inissialiortitsinermik atugassanik taarsigassarsissasoq. Aamma kumuunimi innuttaasut skattimut akileraartarnissaat qaffassasoq.
Allattoq Ivik Kristiansen
novembarip 28-at 2013 02:11

Kommuneqarfik Sermersooq sanaartorfigineqarani aningaasaliiffigineqaranilu ajortikkiartussanngilaq. Kommunip aningaasanut missingersuutaata ukiup tullianit atulertussap tamanna soorlumi oqariartuutigigaa.

Tasiilamut Nuummullu nuuttartut amerliartorput, illoqarfinilu taakkunani inissialiornissaq salliutitsineqassasoq aningaasanut missingersusiornermi takuneqarsinnaassaaq, borgmester Asii Chemnitz Narup oqarpoq. Taamaattoq kumuuni 176 millioninik taarsigassanik atorniarpoq sanaartornissamut atugassanik.

- Inuit pisinnaatitaaffigisariaqarpaat ineqarsinnaatitaallutik. Nuup illoqarfiani Tasiilamilu ukiorpassuarni utaqqeqqaarlutik initaarsinnaasarput. Taanna uagut akuersaaruminaatsipparput taamaattumik taakkunani inissianik sanaartorneq annertuvoq, Asii Chemnitz Narup oqarpoq.

Sanaartornermut politikkip tungaatigut kommuni naalakkersuisullu assigiimmik ajornartorsiuteqarput.

Tassa aningaasat sanaartornermut atugassanut tunniunneqarsimasut atorneqannginnerat, pilersaarusiornerlunnermik tunngavilik peqqutigalugu.

Aningaasat sanaartornermut salliutinneqarsimasut tamarmik atorneqarneqarnavianngillat, kumuunilu tamanna pillugu pikkorinnerulissaaq, taamaattoq kumuunimi sanaartornermik pilersaarusiornissamut, sanaartornerup iluani suliffeqarfiit peqatigalugit, sulissuteqarpoq, Asii Chemnitz Narup aamma oqaatigaa.

Aningaasaqarnermik naalakkersuisoq, Vittus Qujaukitsoq, parteeqatinilu, KANUKOKA-mi siulittaasoq, Martha Abelsen, aamma Siumumit kumuunit aqunneqartut, ungasinngitsukkut  isumaqatigiipput Kommuneqarfik Sermersuumit tapiissutit 20 milliuunit koruunit kommuninut allanut siaruassasut.

Aningaasallu taakku allatut nassaarineqartariaqarsimapput.

Aningaasamut Inatsit sanaartornermut aningaasaliissutinik imaqarpallaanngimmat allatut eqqarsarnissaq pisariaqartilersimavaa.

Inuit Ataqatigiit sinnerlugu Kommunalbestyrelsimi ilaasortaq Mille Søvndahl Pedersen aningaasanut missilersuineq qanoq ingerlasimanersoq nassuiaavoq.

- Missingersuutit suliarillugit aallartikkatsigit ajunngilaq, ingerlavugut. Kisianni taava paaseriataarparput 20 milliuuninik ilanngaaviginiarpaatigut taassumalu saniatigut aamma sanaartorfigerusunnatigut. Taamaattumik unikaallappugut, tamatta assorujussuaq eqqarsarnartoqartipparput. Kommuneqarfik Sermersuumi kommunalbestyrelsiani partiit tamarmik. Taamaattumik eqqarsaqqittariaqarsimavugut: Nå, taava qanoq iliussaagut, Kommuneqarfik Sermersuumi Sanarfinermut Avatangiisinullu Ataatsimiititaliami siulittaasoq Mille Søvndahl Pedersen taama oqarpoq.

Akileraartarneq procentpointimik ataatsimik qaffanneqarpat 26 procentimik innuttaasut akileraaruteqartalissapput.

Kommuneqarfik Sermersuumi borgmesterip, Asii Chemnitz Narupip, oqaatigaa tamanna annilaangatissaanngitsoq, pissutigalugu Kommuneqarfik Sermersuumi akileraarutit kumuunit allanut naleqqiullugu suli minnerummata.

Borgmesterilli aamma oqaatigaa skattimut akileraarutit qaffannissaat ajuusaarutigalugu, Nunatsinni skattimut akiliisarneq akissarsiaqarnerusunut akissarsiakinnernullu skattimut akileraartarnerisa procentii assigiimmata, taamaattorli akissarsiakinnerit eqqorneqassallutik.