Sanaartornermik Ilinniarfimmi qinersisuusaartitsisoqarpoq
Taakkua aalajangiisuussagaluarpata, inuusuttut sumiuussuserlu apeqqutaatillugit qinersisoqassagaluarpoq.
Sanaartornermik Ilinniarfimmiut Nunatta folketingimut ilaasortaatitassai kikkuussanersut aalajangertussaasuuppassuk, tassaassagaluarput Inuit Ataqatigiit qaffariartupiloortortaat Juliane Henningsen – aamma Palle Christiansen Demokraatineersuunermi saniatigut Sisimiuneersuusoq. Siumukkormiuni qinigaanerpaavoq siullermeerluni qinigassanngortittoq Mininnguaq Kleist – Atassummiillu qinigaanerpaalluni misilittagalik sulilu inuusuttutut taaneqarsinnaasoq Ellen Christoffersen.
Maannali Sanaartornermik Ilinniarfimmiut inuusuttut kisimik qinersisussaanngillat – kisianni qinigassanngortittut qinersisuusaarneq paasisaqarfigilluarsinnaavaat.
Tassami qinersisuusaartut arfiniliugaangata, arfernata kina qinissanerlugu suli naluaa – taamaattumik qinersinissamut sapaatip akunnera kingulleq ilungersorfigissallugu akilersinnaassaaq.
Qineqqusaarnerlu aamma KNR-imi ingerlaqqissaaq - tassami unnugu nalunaaqutaq arfineq pingasunut KNR-TV-kkut siullermeersumik apeqqarissaartoqassammat – tamatumalu kingorna radiukkut oqallittoqassalluni.
