Sanaartornermik Ilinniarfimmi kalaallisut soraarummeertut siulliit
Ukiuni siuliini soraarummeernerit tamarmik qallunaatut oqalulluni ingerlanneqartaraluarput. Ukioq mannali marluinnik oqaasilimmik inuiaqatigiilerinermi ilinniartitsisussarsisimallutik ilinniartitsisoq cand. phil. Dorthe Katrine Olsen oqaluttuarpoq.
- Atuakkat qallunaatut allaqqapput, imaali kalaallisuunngortippakka, kalaallisullu qallunaatullu atuartitsissutigisarlugit. Ilinniartullu kalaallisut oqallittaqaagut.
Atuagaq nammineq ilaartorpara, kisitsisillu Sisimiunut tunngassuteqartut ilanngullugit.
Ataasinngormat soraarummeertoqarnerani allaffissornermi ilinniagaqartooq cand. scient. Marie L. Mathiassen soraarummeertunik nalilersuivoq. Soraarummeertullu malugisimanerarpai kalaallisut oqalullutik soraarummeernertik nuannaarutigigaat.
- Ilinniartuvut amerlanerit kalaallisut oqaaseqartuupput, taamaammat pissusissamisuuginnarpoq soraarummeernerni oqaatsisik atorlugit ilinniartut soraarummeertarnissaat.
Misilittakkaka tunngavigalugit ilisimavara soraarummeernerni qallunaatut naliliisoqartillugu ilinniartut imminnut tatigivallaarneq ajortut, oqaqqartornerusartullu. Kingunerisarpaalu nalilerneqarnermi karakteerilunneq, Marie L. Mathiassen naggasiivoq.
