Umiarsuaaraq assartuut, sanaartornermi atortorpassuarnik maskiinanik useqartoq sapaatit akunneri pingasut matuma siorna Tunumi kivivoq. Umiarsuaaraq pingasunik inuttaqarpoq, inuttallu umiarsuaaqqap ingerlaqatigisaanit qujanartumik annaanneqarlutik.

Umiarsuaaqqap assartuutip Kulusuup eqqaani Ikkattimi amerikamiut qimararsimasaanit savimerngit piiarlugit saliiffigineqarnerani maskiinat atorneqartut assartugarai. Kommuneqarfik Sermersuup Qaqortumit suliffeqarfik sumiiffimmi tassani saleeqatigaa, umiarsuaararlu kujammut Qaqortumut ingerlaartilluni kivivoq.

AAMMA ATUARUK Ikkattimi qimanneqarsimasut salinneqaleruttorput

Umiarsuaaqqap sanaartornermi maskiinat qassiiusut userisimagai, Kommuneqarfik Sermersuumi avatangiisinut pisortaq, Frank Rasmussen oqarpoq.

- Umiarsuaaraq assartuut qujanartumik ingerlaqateqarpoq, taamaalillutillu inuttat annaanneqapallallutik. Taamaalilluni umiarsuaq, maskiinat namminerlu pigisat allat kisimik annaaneqarput, Frank Rasmussen oqarpoq.

Issittumi Sakkutooqarfik umiarsuaaqqap tunup sineriaani kivinerani ajunaalernermi kalerrisaarummik tigusaqarpoq, Issittumi Sakkutooqarfiulli umiiartoqarneranik misissuisoqarneranut atatillugu Kalaallit Nunaanni Politiit innersuussutigaat.

AAMMA ATUARUK Umiarsuaaraq Tunumi kivisoq

Kalaallit Nunaannili Politiit paasissutissarpassuarnik tigummiaqanngilaq. Umiuneq pillugu suliaq Imarsiornermi Aqutsisoqarfimmut Imaatigullu ajutoornerit pillugit ataatsimiititaliarsuarmut ingerlateqqinneqarsimasoq, politiit ilisimatitsissutigaat.