Sanaartorneq pillugu nalunaarusiaq naammassivoq
Nunatsinni sanaartornermik suliaqartut kalaallit qallunaanut naleqqiullutik amerlanerulersimapput. Namminersornerullutik Oqartussat iluarsartuusseqqinnissamut pilersaarutaannut atatillugu, sanaartorneq pillugu Naatsorsueqqissaartarfiup ukiuni arfinilinni misissuinermini nalunaarusiaa, ullumi saqqummiunneqartoq taama ersersitsivoq. Martin Ben Shalmi, Namminersornerullutik Oqartussani iluarsartuusseqqissamik pilersaarusiornermut suleqataasoq oqarpoq misissuinermi paasisat tupaallaataasut marluusut:
- Tupaallaatigisarput siulleq tassaavoq kalaallit sanaartornermik suliaqartut qallunaanit amerlaninngorsimanerat, tassa sanaartortut tamat 100 procentiunerat eqqarsaatigissagaanni kalaallit qallunaanut naleqqiullutik 66 procentinngorsimapput, Martin Ben Shalmi oqarpoq.
Tupaallatigineqartoq alla tassaavoq sanaartornermi suliaqartut taarseraannerujussuat. Ukiuni arfinilinni, tassa 1998-miit 2003 ilanngullugu misissuinermi paasineqarpoq, sanaartornermik suliaqartuni 13 procentiinnaat suliffimminni aalajaatsuusut.
- Tassa imaappoq ullumikkut sanaartortut 100-gunik ukiut arfinillit qaangiuppata 13-iinnanngorsimassapput, taamalu ingerlasoqaannassappat ernumassutissaqarpugut, Martin Ben Shalmi nassuiaavoq.
Misissuineq naapertussagaanni aamma eqqoriarneqarsinaanerarpaa, sanaartortut ullumikkut 100-gunik aappaagu affangajassuisa sanaartorneq qimakkumaaraat. Sanaartornermik suliaqartut taarseraannerujussuat pissutigalugu ilisimasassarpassuit kingulissanut ingerlateqqitassat tamaalillutik annaaneqartarput.
Nalunaarusiap aamma ersersippaa sanaartornermik suliaqartuni sulisut utaqqasaanerit 45-iniit qummut ukiullit amerlanersaat tikisitaasut, sanaartornermi immikkut ilinniagaqarsimasut. 45-inik ukiulinnit inuusunnerit taarseraannerujussuullutik.
- Tikisitat utaqqasaanerit ukiut qulit qaangiuppata soraarninngorpata taarserneqartariaqalissapput, tamannalu pissutigalugu nunatsinni sanaartornermik ilinniagaqarnerup massakkumiit annertuumik suliniuteqarfigilereernissaa assut pingaaruteqarpoq, Ben Shalmi erseqqissaavoq.
Namminersornerullutik Oqartussanit sanaartornerup ingerlarnganik misissuisitsineranit nalunaarusiaq iluarsartusseqqinnissamut aqutsisunut nassiunneqassaaq, Naalakkersuisunut inassutiqaateqarnissaq siunertaralugu.
