Sanaartorneq ajutoorpoq
Nummi Qinngutsinni inissialiornerup ajalusoornerata kingornagut, sanaartugassanik suliassinneqartartoq, Jesper Jensen, aningaasanik peqquserlussimasutut Sven Lysep politiinut nalunaarutigaa. Sermitsiap nittartagaani taama allaaserinnittoqarpoq.
Jesper Jensenip suliffeqarfiutaa, Jensen Entreprise Aps, sapaatip akunnerani kingullermi akiliisinnaajunnaarpoq, akiliisinnaajunnaarnerminilu Sven Lysep suliffeqarfiutaa illunik niuertoq, Nuna ApS, nassataralugu.
Sven Lyse oqarpoq, politiinut nalunaarutiginninnermi pineqartut, sanaartugassanik tuniniaavimmit sanaartugassanut atortunut tunisat allagartaat, tassa fakturat, sanaartorfimmi takussaanngitsut – immaqalu pisiarineqarsimanngisaannartut.