Ilisimatusartut DTU Bygimeersut naliliinerminni betonngit saavisigut oqorsaasersueriaaseq atorlugu sanaartorneq nunani kiannerusuni atorneqarluarsinnaanerarpaat, issittumili sumiiffinni anorersuartartuni innersuunnannginerarlugu.Assi: DTU Byg

Ilisimatuut: Sanaartoriaaseq nunatsinnut naleqqutinngitsoq Nuummi inissiarsualiornermi atorneqarsimasoq

Sueq nillerlu Namminersorlutik Oqartussat inissiaatileqatigiiffiata Illuut A/S-ip Qinngporpumi Nuummiittumi inissiaassuisa nutaajunerusut ilaanni najugalinnit ulluinnarsiutaalersimapput. Nunatsinni taama sanaartoriaaseqarneq DTU Bygimit maanna nangaasaarutigineqarpoq.

Nuummi najugaqarfiit ilaanni Unaami Qinngorpumiittumi inissiarsuit iluisiguunngitsoq silataasigulli oqorsaasigaammata taakkunani inissiani katillugit 48-suni najugallit suertumi nillertumilu najugaqartuunertik naammagiinnartariaqarpaat.

Aamma inissiarsuit najugaqarfigisatik ukiunik marlooqqajanngitsunik pisoqaassuseqaraluartulluunniit.

Ilisimatuut Danmarkimi DTU Bygimeersut Tove Lading aamma Eva B. Møller – Issittumi sanaartorneq pillugu immikkut ilisimasaliusut inissiaatileqatigiiffiullu Illuut A/S-ip inissiarsuaataanik misissuisitaasimasut – taama naliliipput.

AAMMA ATUARUK Namminersorlutik Oqartussat inissianik iluarsartuussinissamut kinguaattooqqaqisut

Naliliinerisalu inernerat paatsuugassaanngivippoq:

Inissiarsuit taakku ilaatigut sanaartorfimmi betonngiliat atorlugit sanaajupput, betonngip iluatiguunngitsoq silataatigulli oqorsaasigaallutik.

Sanaartoriaaseq taanna pisariinnerullunilu akikinnerusinnaavoq, ilaatigut Danmarkimi issaasannerusumi Islandimilu kiammik nunap iluaneersumik kiassaaffiusinnaasumi atussallugu piukkunnarsinnaalluni.

Inissiarsuilli illup iigaasigut silarlikkut oqorsaaserneri iikkamut attuumalluinnangikkaangata saanaartoriaaseq taanna sumiiffinni issinnerusuni atussallugu nalorninartoqarsinnaavoq. Taamaakkaangatami anorip oqorsaatinut supuneratigut inissiat suilersarmata.

AAMMA ATUARUK DTU kalaallit inissiaataanni misissuissasoq

Nuummilu inissiarsuarni nutaajusuni taamatorpiaq ittoqarpoq.

- Paasivarpummi inissiarsuit najugaqarfimmi Unaamiittut betonngiisa saavi maniilappallaarmata iigaasigut silarlikkut oqorsaaserneqarsimanerat naleqqutinngitsuusoq anorilu oqorsaatit ilaannut supusartoq, Tove Lading DTU Bygimeersoq oqarpoq.

Taamaattumik DTU Bygip Kalaallit Nunaanni taamatut sanaartortarnissaq nangaasaarutigaa. Najugaqarfimmi Umaami inissiarsuit anorimut illersuutilersugaanngillat, anorimullu illersuutit Kalaallit Nunaanni siunissami nutaanik inissiarsualiornermi atorneqalertariaqaraluarput, ilisimatusartut kajumissaaruteqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat