Sanaartorfissuaq uranitaqarmat pisiniarfissualiorneq unippoq

(Apriilip aallaqqaataani salloqittaat, aaqqi.)

Nuummi pisiniarfissualiassamik sanaartorneq ippassaq unitsikkallarneqarpoq.

Angutit qaartiterisutut sulisut marluk, ukiaagaa sanaartorfimmi suleqataasut napparsimalersinertik pillugu piffissami aalajangingaanngitsumi sulinngiffeqartitaalermata, suliaq unitsinneqarallarpoq.

Angutit pineqartut amimikkut anillattoortarsimallutillu niaqorlorujussuartarsimapput.  Nakorsamit misissorneqarneranni paasineqarpoq, taakku uranip qinngorneranik radioaktiviusumik eqqorneqarsimasut.

Tamanna paasineqarmat, pisiniarfissualiornermi toqqavik misissoqqissaarneqalerpoq, tassanilu paasineqarluni toqqavimmi qaarsoq uranitaqalaartoq.

Naalakkersuisut uranitaqanngilluinnartunik piiaasoqannginnissaanut politikkiat pissutaalluni maanna sanaartoq unitsinneqarallarpoq.

Sanaartornerullu unitsinneqarnera aamma politikkikkut allamik nassataqarpoq.

Partiini Siumukkut kisiartaallutik uranitalinnik piiaasinnaanermut illersuisut allamik isummernialerunarput.

-Sanaartorfik sullivitsinnut, tassa Inatsisartut ataatsimiittarfiannut, qinippallaaqaaq, tassami ilaasortat ulloq naallugu ilaanni tanaaniittariaqartaramik. Siumup partiiani isumaqarpugut demokratii toqqaannartumik ulorinartorsiortinneqartoq, Siumumi ilaasortaq nuiasoq kinaanerminik isertuusserusuttoq oqarpoq.

Radioaviisip paasisai naapertorlugit, Inuit Ataqatigiinni ilaasortat arnaanerusut aatsitassanik uranitalinnik piiaasinnaanermut akerliunertik isummerfigeqqinniarlugu maanna eqqarsaatigilersimavaat. Tassami urani tamaani piiarneqanngippat niuertarfissarsuarmi pisiniartannginnissartik uggorilersimagamikku.

Pisiniarfissarsuarmik sanaartorfik maanna Ineqarnermut Sillimaniarnermullu aqutsisoqarfimmit misissoqqissaarneqartussanngorpoq, tamannalu pereerpat sanaartorneq aatsaat aallarteqqissinnaasoq oqaatigineqarluni.