SANA pillugu iluarsiiniarneq

Dronning Ingridip napparsimmavissua, maanna ajornartorsiorfiusoq matuneqarnissaalu aarlerigineqartoq pillugu Naalakkersuisoqarfimmiit akisussaasut ilaat, Martha Lund Olsen oqarpoq, maannakkorpiaq immikkut 17,5 milliuunit koruuninik taperneqarnissamut qinnuteqaat suliaralugu.
oktobarip 29-at 2008 16:14

Martha Lund ilaatigut oqaatigaa peqqissaasutut taartaasartut aningaasartuutaasimaqisut, taamatullu sinerissamiit Nuummut angalatitsisarneq annertusimaqisoq kiisalu tarnimikkut nappaatillit Riskovimiittariaqartut amerlanerusimasut. Aasaq immikkut tapiissutigineqarsimasut eqqaaneqartut 20 miliuunit koruuniummata, ukioq manna tassa katillugit 37,5 milliuuni koruuninik tapiisoqalerunarpoq. Peqqissutsimut naalakkersuisoqarfimmi pisortaq, Martha Lund Olsen taamatut oqarpoq. 2009-mi aningaasartuutissat suli isumaqatigiinniutigineqarmata SANA-mut qanoq aningaasaliisoqassanersoq naluarput, politikerilli arlaatigut iluarsiissutissanik saqqummiisariaqassapput.

Inatsisartut peqqissutsimut ataatsimiititaliaat ualimut nalunaaqutaq pingasup qeqqanut immikkut ittumik ataatsimiisinneqarpoq, tassani napparsimasut katsorsarneqarnissaminnut utaqqisut amerliartuinnarnerat, aatsaallu peruluttut kisimik katsorsarneqarsinnaalernerat iluarsiiffiginiarneqarpoq.

Ataatsimiititalialli qanoq inerniliinera pissangalluta aqagumut utaqqisariaqarparput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq