SANA-p ajaappiaatini ujartorpai
Inuit ajoqusersimasut ajorunnaaraangamik ikiorsiissutitut atortorissaarutit atukkatik uterteqqittanngimmatigik tamatumunnga patsisaasoq, timimik sungiusaasut pisortaata Jørgen Jelving-ip Nuuk tv-mut oqaatigaa.
Tamanna ajornartorsiutaavoq, tamatumammi kinguneranik atortunik amigaateqarnerup saniatigut aningaasartuutaarujussuarsinnaagami.
- Ajaappissat, ajappaartorfiit pisuutillu kaaviiaarnissaat tunngavigaarput, taamaalillutimmi pisariaqartitsilersut atugassaqarniassammata, Jørgen Jelving Nuuk tv-mut oqarpoq.
Napparsimasut atortorissaarutit atukkamik utertinnissaat puigortarpaat, atugaallu utertinniarlugit sulisunit saaffigineqaraangamik atukkatik tigummiunnaareersimasarlugit:
- Isumaqarpugut inuit atortorissaarutinik atoraangamik pitsaaneruleraangamillu atorunnaartaraat, immaqalu utertinnissaanut piareersimanngitsutut misigisimagaangamik tigummiinnartaraat, angerlarsimaffimminnilu piareersimatittarlugit, taamaalillunilu tigumminerat puigortoorneqartarluni, Jørgen Jelving oqarpoq.