SANA-mi immikkoortortami pisortaq: Aningaasaleeqqittoqartariaqarpoq

Dronning Ingridip napparsimmavissuani sulisussaaleqinerup aaqqiivigineqarallarnissaannut pilersaarutit, peqqinnissaqarfimmi aqutsisut ullumi saqqummiuppaat, naallu tamanna immikkoortortaqarfimmi aqutsisumit Niviaq Lindimit iluarineqaraluartoq pilersaarutit amigaateqartutut nalilerneqarput.
Allattoq Mads Lynge
februaarip 10-at 2009 15:08

- Peqqissaasunik naammattunik peqarniassagutta aningaasaleeqqittoqartariaqarpoq. Tamanna nassuerutigisariaqarparput. Ullumikkutut ingerlaannassappat ullormiit ullormut suliassagut nalilersoqqissaartariaqartarpavut. Napparsimasut qassit uninngasuutigisinnaanerivut nalilersortariaqarsinnaasarpavut. Naammattunik assassaqassagutta allatut ajornartumik taamaaliortariaqassaagut, Niviaq Lind oqarpoq, nangipporlu:

- Ilinniartuuteqarneq akisussaaffigisinnaajunnaarlugu immikkoortortaqarfinni aqutsisutut nalunaarutigereerparput, ulluinnarnilu uninngasut akisussaaffigisinnaajunnaaratsigit aamma nalunaarutiginikuuarput. Pissutsit taamaannerat soorunami ajuusaarnartorujussuuvoq. Ikiuussinnaanerput taama killeqartigitillugu inummut naammaginarsinnaanngilaq, Dronning Ingridip napparsimmavissuani immikkoortortami aqutsisoq Niviaq Lind oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq