Sana eqqartuussiviit qullersaannit taperserneqarpoq

Nutartigaq nal. 17:15

Nuummi eqqartuussiviup angut tarnimikkut napparsimasut uninngavianni misissugassanngorlugu decembarimi 2009-mi eqqartuuppaa.

Region Sjællandip paaqqutarinninnerminnut aningaasartuutit Dronning Ingridip Napparsimmavissuanut tamatuma kingorna akiligassanngortikkaluarpai.

Vordingborgip napparsimmavissuanut apuutereernermi kingorna, angutip kalaallip paarsisut ilaat saassuppaa, tamatumalu kingorna napparsimmavimmut isumannaallisakkamut inissinneqartussanngorlugu Vordingborgimi eqqartuunneqarluni.

Tassaneereernermi kingorna angut Risskovimi tarnimikkut napparsimasut inissinneqartarfiannut nuutsinneqarpoq. Angut ukiuni arfineq-marlunni maannamut danskit napparsimmavianneereerpoq.

Angutip paarsarineranut akiligassat 14 millionit koruunit Region Sjællandip Nunatta Peqqinnissaqarfianut akiligassanngortippai. Nunatsinnili Peqqinnissaqarfiup akiliisussaannginnini attattuarpaa, isumaqarami angutip allamut inissinneqarnera, Region Sjællandip nammineq akilissagaa.

Tamatuma kinguneranik Kalaallit Nunaata suliaq eqqartuussiviit qullersaannut, Højesteretimut, suliassanngortippaa, tassalu eqqartuusivik Kalaallit Nunaat illersorlugu ullumi aalajangiivoq.

Region Sjællandip akiligassat amerlanersaat maannamut akilereerpai, akiligassallu ilai 4 millionit koruunit akilerniarnagit oqaraluarpoq, isumaqarami suliaq nutaanngilisooreersoq. Aamma taamatut isumaqarnera eqqartuussisut ilalinngilaat.

Region Sjællandip akiligassiissutit Kalaallit Nunaannut uterteqqissavai, taassumalu saniatigut eqqartuussinermi aningaasartuutit katillugit 125.000 koruunit akilissallugit.

Peqqissutsimut Naalakkersuisoqarfiup pisortaata Ann Birkekær Kjeldsenip eqqartuussisut naliliinerat iluaraa.

-Eqqartuussisut naliliinerat iluarisorujussuuarput. 2009-mi eqqartuussivikkut ingerlanneqarsimasut uagut pigaagut. Tamanna ullumi eqqartuussivimmi naliliisoqarnerata naqissuserpaa.