Samerådet nalliuttorsiorpoq

Saamet siunnersuisoqatigiiffiat, Samerådet, ullumi ukiunik 50-inngortorsiorpoq. Tamanna Samerådip 18-issaannik ataatsimiinnerani Norgep avannaani Honningvågimi ingerlanneqartumi nalliuttorsiutigineqarpoq.

Nalliuttorsiorneq saaminit 250-init peqataaffigineqartoq, taakku Norgemit, Sverigimit, Finlandimit Ruslandimiillu aggersuullutik.

Ataatsimiinnermi oqalusserisassat pingaartut ilagaat silaannaap allanngoriartornera, tamatumalu saaminut sunniutigisinnaasai. Tamatuma saniatigut nunagisat pillugit pisinnaatitaaffiit, pisuussutinik atorluaasinnaaneq nunallu inoqqaavisa psinnaatitaaffii eqqartorneqarput.

Saamit ICC-llu akornanni politikikkikkut aningaasarsiornikkullu suleqatigiinnissaq pillugu nutaamik isumaqatigiissusiortoqarnissaa aamma  pilersaarutaavoq. Inuit Issittormiut Kattuffiata saamillu suleqatigiinnerat aappaagu aallartissasoq. ICC sinnerlugu peqataasoq, Hjalmar Dahl, ilisimatitsivoq FN-ip nunat inoqqaavisa atugaat pillugit isummersoqatigiiffiata najoqqutassiai tunngavigalugit suleqatigiinneq ingerlanneqassasoq.