Sallunersoq sallunnginnersorluunniit nalunarpoq
Sikkilertartup Michael Rasmussenip Tour de France sioqqullugu sumiissimanerminik aviisimi timersornermik sammisaqartumi La Gazetta dello Sport-imi eqqunngitsumik issuarneqarsimaneranik oqalunneq Italiamiup aviisiliortup Claudio Ghisalbertip eqqunngitsuunerarpaa.
Aviisiliortoq Michael Rasmussenimit ippassaq attaveqarfigineqarpoq, sikkilertartup kissaatigaa oqaaseqarnini aaqqinneqassasoq nassuerutigalugulu Tour de France sioqqullugu qaqqarsuarni Dolomittiniissimalluni, naak nunani tamani sikkilertartut kattuffiannut UCI-mut Mexicomiissimanini nalunaarutigisimagaluarlugu.
- Aaqqiissuteqarnavianngilluinnarpunga. Qularutissaanngitsumimmi oqarpoq piffissami tassani qaqqarsuarni Dolomittiniissimalluni. Kingusinnerusukkut apersuininni aperiganni, sooq sallulluni Mexicomiinnerarnersoq, ima akivoq:
“Tamatuma nalaani pisut peqqutigalugit sooq salluliornerlunga oqaatigisinnaanngilara”, Claudio Ghisalbertip DR Sportimut Michael Rasmussen taama issuarpaa.
