Sallunaveeqqutitut tigummineqareerluni iperagaasoq

Allattoq Mads Lynge
juulip 04-at 2007 11:11

Ullut 114-it aallarussaaqqareerluni tuluit nutaarsiassaqartitsiviani BBC-mi tusagassiortoq Allan Johnston Gaza-mi iperagaavoq.

Aallarussisuisa piumasaqaateqaratik Hamas-ikkunnut Gaza-mi ullaaq tunniuppaat.

Eqqarsartaatsini ullut tamaasa suliarisariaqartarsimallugit Allan Johnston oqaluttuarpoq.

Qaammatit arlallit Allan Jonhstonip seqineq takusimanngilaa, ullumili iperagaavoq. Tusagassiortoq 45-inik ukiulik ukiut pingasut Gaza-mi BBC-mut sulisimavoq. Marsip ulluisa aqqaneq-aappaanni Allan Johnston Islamip sakkutuuinik imminnut taajortunit aallarussaavoq. Allan Johnston oqarpoq naalliutsitaasimanani, piffissalli ilaani nerisani pisuullutik napparsimasarsimalluni, toqutaanissaminullu siorasaarneqartarsimalluni.

Hamas-illu qaammat kingulleq Gaza tiguarmagu, aallarussisut annilaangalersimasut Allan Johnstonip tusagassiortunik katersiortitsinermi ullumi oqaatigaa.

Hamas-ip naalagaata iperagaatitsinermut nammineq aqqutissiuisuunerarpoq. Iperagaasitsinerup ersersippaa ilumut pissutsit ilorraap tungaanut saatsikkusukkigut, Hamas-ip naalagaa oqarpoq.

Tusagassiivik Reuters naapertorlugu Allan Johnstonimik tigusarinnissimasut Hamas-ikkullu ingasaassiniartartut toqutaanissaannik muslimit palasiisa ataqqineqartut ilaat piumasaqareersorlu Allan Johnstoni iperagaasoq.

Allan Johnston massakkut tuluit aallartitaqarfiaanni Jerusalemimiippoq.

Alan Johnstonip iperagaanera allamik aamma neriuuteqalersitsivoq, tassa Israelimiut sakkutuuisa ilaat, Ghilad Shalit, sallunaveeqqutitut siornali tigummineqartoq iperagaasinnaanissaa neriuutigineqalermat.