Sallunaveeqqutit tigummisat Aghanistan-imi suli uumapput
Koreami Kujallermiut ikiortitut sulisut 22-t Afghanistanimi Talibaninit sallunaveeqqutitut tigummineqartut suli uumapput.
Taama nalunaarpoq Afghanistanimi naalagaaffimmi pissutsinut ministerip tullia Munir Mangal. Talebanit oqarnikuugaluarput piumasaqaatitik naalakkersuisunit akuerineqanngippata tigusatik toqorarniarlugit.
Maannali piffissaliunneqartoq piffissamut aalajangersimanngitsumut kinguartinneqarpoq.
- Sallunaveeqqutitut tigusarinnittut periusissartik isumaqatigiissutigineq ajulersimagunarpaat taamalu naalakkersuisunut isumaqatigiinniarnissamut piareeqqanatik, taama oqarpoq isumaqatigiinniartussanut ilaasoq Khawaja Mohammad Sedeqi.
- Sallunaveeqqutitut tigusarinnittut piffissalerneqarnissartik kissaatigaat aamma isumaqatigiinniarnissamut piareerunik nalunaarfiginiarpaatigut, Sedeqi tyskit nutaarsiassaqartitsiviannut DPA-mut oqarpoq.
Sallunaveeqqutitut tigusarinnittut suliniaqatigiinnut assigiinngitsunut ilaapput sallunaveeqqutitullu tigusat iperagaatinneqarnissaannut assigiinngitsunik piumasaqaateqarlutik. Tigusarinnittut ilaasa naalakkersuisut tigusaminnik talibaniusunik iperaanissaat piumasaraat, ilaasali iperagaasitsinissamut akiliisoqarpat naammagissallugu.
