Salloqittaavimmi oqaluttualiaq
Siriusikkut tunup avannaarsuani kangerlummi Ardencaple-mik atserneqarsimasumi inuiaqatigiinnik maannamut ilisimaneqanngitsunik naammattoorsipput.
Ilisimatuut silarsuarmit tamaneersut Nuummukaapput inuiaqatigiit taakku oqaasii, serius patruljemit immiunneqarsimasut misissoqqissaariartorlugit.
Michael Ranslirpa Jakobsen Sirius patrulje-mi oversergent-iusoq oqaluttuarpoq angalanerminni tikittagarinngisaminnut aqqusaarnerminni, illoqqortoomiut avannaatungaanni ukiivimmik naammattuuisimallutik.
- angalaarnitsinni kangerlukkoortilluta tikittarinngisatsinnut pigatta ukiivimmik naammattuuivugut qangarnisarpasittumik.
Siullermik eqqumiigeqqaarparput tamaani inoqarmat, tassami sumiiffigisatta nalaani angalaartoqassatillugu nalunaarfigineqartaratta. Aatsaat kingusinnerusukkut paasilerparput uku tassaasut inuiaqatigiit ullutsinni inuunermut attaveqarsimanngisaannartut. Danmarkimut nalunaaruteqarpugut, angutillu inuusuttup oqaaserisai immiullugit, satilitikkullu nassiullugit.
Taama Michael Ranslirpa Jakobsen serius patrulje-minngaanneersoq oqaluttuarpoq.
Nunatta katersugaasivianut tusarniaagatta, katersugaasiviup pisortaa Daniel Thorleifsen ima oqarpoq.
- Ippassiami qallunaat naalagaaffianinngaanniit nalunaarfigineqaratta taamatut inunnik takunnittoqarsimasoq taava pilersaarusiulerpugut tunumukarniarluta pingasunngorpat aallarluta katersugaasivimminngaanniit inuit pingasuulluta taavalu nakorsamik aamma ilalerluta, tassani paasiniassallugu inooriaasiat qanoq inooriaaseqarnersut atisaallu qanoq ittuunersut taavalu oqaasii assigiinngitsut tamakkua paasiniarniarlutigit. Tassa massakkut una isertuutikannerlugu ingerlanneqarami qallunaat naalagaaffianinngaanniit aatsaat massakkut avammut tusarliunneqarpoq, aatsaallu massakkut ulluni qaninnerni silarsuarmioqatigiinnut siaruassaaq, taamaalilluni qularnanngilaq assorujussuaq isiginiarneqassasoq aamma taanna
Nunatta katersugaasiviani pisortaq Daniel Thorleifsen taama oqarpoq.
Radioavisi aamma naalakkersuisunit akuerineqarluni tunup avannaarsuani immiussat ilamernganik aallakaatitsissaaq, paasinnittoqarsinnaanissaa neriuutigineqarmat. utoqqatsissutigissavarput immiussaq satilitikkut nassiussaanera pissutigalugu nipilummat.
Oqaasilerifimmi immiussaq tamakkerlugu pigineqarmat sukumiisumillu misissugaalereermat, pisortaq Karl Christian Olsen oqaloqatigaarput.
- Tassa ataasiakkaat ilisarnarput soorlu aliuutillu Juppiillu Alaska kujataamiut oqaasiinut qanittuararsuarmik oqariartaaseqarput soorlu oqaatsit ataasiakkaat taanarr imeq kanuarr savimineq kanngussak soorlu taamaattut taavalu aamma oqaasiisa ilaanni maluginiakkatta ilagaat soorlu Jualu Ivalu Ujalu, ilaa taamaattut… immaqa ukiut 6000-t matuma siorngatigut oqaasiusinnaasut atorlugit oqaluttartut. Paasilluassagutsigit naggueqatigut immaqa kippasinnerpaat Siberiamiullu Alaskallu kujataamiui ikiortigalugit aatsaat paasilluarsinnaassagaluarpagut, taama Karl Christian Olsen oqasileriffimmi pisortaq oqarpoq.
