Salloqittaatit imaaginnavipput
Sulilu ilaqarput:
AG-mi ullumi saqqummersumi atuarneqarsinnaavoq Hans Egedep kukkulluni nunatsinni inississimanerata kingunipilui tamaanga killittariaqartut. Allaaserisami oqaatigineqarpoq Naalakkersuisut isortortumik suleqatigiissitaliorsimasut Sisimiut illoqarfittut pingaarnersanngortinnissaannik sulissutiginnittumik.
Allaaserineqarujuttaaq Sisimiut Kangerlussuullu akornanni franskit suliffeqarfissuat Aprilius du Force aqqusinniulersaartoq.
Sermitsiami oqaluttuarineqarpoq Nuup kangerluani kuulteqarferujussuarmik isaannarmik takuneqarsinnaasumik nassaarnerup kingorna sinerissatsinni nakkutilliissutitaarput ”Knud Rasmussen” nakkutilliisinneqalersimasoq.
Danskit tusagassiutaanni salloqittaavik nunatsinnuttaaq sammitinneqarpoq. Aviisimi Metro X-pressimi allaaserineqarpoq nunarput tunineqarsimasoq 1200 mia.-lerlugu. Tunisinerlu Dk-mi nunatsinnilu naalakkersuinermik sulialinnit nuannaarutigineqarsimaqisoq; whiskymillu immiorfissuup Johnny Walkerip nunatta sermersuanik sermitalimmik whiskymik tuniniaasalernissani qilanaareqigaa.
DRip immikkoortortaani Østjyllandimi nalunaarutigineqarpoq uumasuusivimmi issittup nanua allarsuarlu piaqqisimasut, atserneqarsimasorlu: Kivaattiqollas – killormut saatsikkaanni salloqittaavik…
Radioavisimit nassuerutigissavarput Alcoap atomip nukinganik innaallagissiorfiliorniarneranik ullaaq oqaluttuarput salloqittaataasoq. Oqaatigisinnaavarpulli politikerit ilaata tusakkani upperalugu ilumut salloqittaataannginnersoq politikereqatini sianerfigisimammagu.
