Salloqittaalluni inniminniisaqattaartoq paasineqarpoq

Timmisartortitseqatigiiffimmi Cimber Sterlingimi timmisartortartoq ataaseq, timmisartortitseqatigiiffimmut unammillertigisaminnut Norwegianimut, sapaatip akunnerata siuliani salloqittaalluni inniminniisaqattaartuusoq paasineqarpoq.
Allattoq Elisa Isaksen
januaarip 25-at 2010 15:45

Nittartakkami epn.dk-mi taama allaaserinnittoqarpoq.

Timmisartortartoq taanna 458-inik salloqittaalluni inniminniisimavoq. Taakkua timmisartut pingasut ilaasorisinnaavaat.

Taassuma bilitsinik inniminniinermini, ilaatigut atit Anders And aamma Dronning Margrethe inniminniissussimavai, matumani Norwegianip ilaasoqarani timmisartuussinissaa siunertaralugu.

Timmisartortartoq taanna epn.dk-mut oqarpoq, iliuutsiminut Cimber Sterlingip aqutsisui ilisimasaqanngitsut.

Timmisartortitseqatigiiffiit Cimber Sterling aamma Norwegian Atlantiku qulaallugu Nunatsinnut timmisartuussisalernissamut soqutiginnillutik nalunaarnikuupput. Cimber Sterling kingullermik nalunaarpoq, Aalborgip Kangerlussuullu akornanni timmisartuussisalernissamut suleqatigiinnissaq pillugu, Air Greenland aappassaanik saaffiginiarneqartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq