Saliineq nammineq akilerusuppaat

januaarip 31-at 2005 10:53

Eqqakkat Amerikamiut sakkutooqarfigisimasaminni qimaannagaasa piiarneqarnissaat nukinginnarpoq, pisariaqassappallu Kalaallit Nunaat nammineq akiliisariaqartoq Demokraatit isumaqarput.

Eqqaavikorsuit nappartanik manngertorninikunik ulikkaartut assingi takutinneqartartut immaqa tamatta takorloorsinnaavagut. Tamakku ukiuni 50-it sinneqartuni maaniinnarmiittut salinneqarnissaat piiarneqarnissallu oqaluuserineqartuarpoq, sulili susoqanngilaq. Saleeqqusillutik noqqaassuteqartut ilagaat folketingimi ilaasortat Lars-Emil Johansen Kuupik Kleistilu, akissutisiaallu kingulleq naapertussagaanni misissuinerit suli amerlanerusut pereerpata aatsaat saliisoqassanersoq aalajangiiffigineqassaaq. Aningaasammi millionilikkaat tamatumani pineqarput.

Demokraatit Folketingimut qinigassanngortitaat Palle Christiansen isumaqarpoq Danmarki utaqqerusaaginnarnagu Kalaallit Nunaat nammineq akileeqqaartariaqartoq:

- Danmarki akileeqataajumassanngikkaluarpat taava nunatta minguitsuuneranik avataaniit qanoq isigineqarusunnerput naapertorlugu iluuseqartariaqassaagut, Palle Christiansen oqarpoq.

Demokraatit siunnersuutigaat saliinerup qanoq ingerlanissaa pilersaarusiorneqassasoq, tamatumani atortussat qanoq ittut atorfissaqartinneqarnersut nalunaarsorneqassallutik. Aamma sulisussat sunik piginnaanillit atorfissaqartinneqarnersut paasisariaqarpoq, inuillu taama sulisorineqartussat ilinniartinneqarlutik, Palle Christiansen oqarpoq.

Kiami tamakkorpassuit akilissavai? Demokraatit isumaat naapertorlugu uagut nammineq akileeqqaartariaqarpugut.

-Isigineqanerput iluatigigutsigu pilliuteqartariaqarpugut, aningaasallu ussaattunit isertinneqarsinnaasut saliinissamut aningaasartuutinut sanilliullugit amerlanerungaarnissaat eqqaaginnarlugu asuliinnaq aningaasartuutitut taaneqarsinnaanngillat, Palle Christiansen oqarpoq.

Qinigassanngortittoq taanna isumaqarpoq aningaasat Danmarkimit USA-millu kingorna utertinneiarneqartariaqassasut, soorlu immaqa arlaannik aningaasaliillutik, soorlu erngup nukinganik innaallagissiorfimmik imaluunniit mittarfimmik, Palle Christiansen siunnersuivoq.